राष्‍ट्रिय सभामा निर्वाचित भएपछि सिटौला कोइराला निवास पुगे

काठमाडौँ- कोशी प्रदेशबाट राष्ट्रिय सभाबाट निर्वाचित भएपछि कृष्णप्रसाद सिटौला शेखर कोइराला निवास पुगेका छन् । शुक्रबार बिहान कोइराला निवास विराटनगरमा पुगेर उनले कोइरालालाई धन्यवाद दिएका छन् ।

सिटौलाले कोइरालालाई तपाइको कारणले निर्वाचित भएको भन्दै धन्यवाद दिएको सहभागी एक नेताले बताए । पछिल्लो समय राष्ट्रिय सभाको निर्वाचनलाई लक्षित गरी कोइराला कोशी प्रदेश पुगेका थिए । गृह जिल्ला मोरङ भएकाले पनि उनले कोशी प्रदेशमा बढी समय बिताउने गरेका छन् ।

---

सिटौलाले बिहीबार भएको राष्ट्रिय सभाको निर्वाचनमा ५ हजार २९२ मत ल्याइ विजयी भएका थिए । उनका प्रतिद्वन्द्वीले भने ४ हजार ५६२ मत ल्याएका थिए ।

सिटौला यसअघि प्रतिनिधि सभाको निर्वाचनमा झापा ३ बाट राप्रपाका अध्यक्ष राजेन्द्र लिङ्देनसँग पराजित भएका थिए । उनी यसपटक सत्ता गठबन्धनको तर्फबाट राष्ट्रिय सभा सदस्यका लागि उम्मेदवार बनेका थिए ।