योगराज उपाध्याय र नुतन थपलियालाई कांग्रेसको सम्मान

काठमाडौँ- नेपाली कांग्रेसले ७८ औं स्थापना दिवसका अवसरमा प्रजातन्त्र प्राप्तिका लागि विभिन्न कालखण्डमा योगदान पुर्याउने अग्रज नेताहरूलाई सम्मान गरेको छ ।

शुक्रबार पार्टी कार्यालय सानेपामा आयोजित एक कार्यक्रमका बीच कांग्रेसले पार्टीको स्थापना कालका सदस्य तथा प्रजातन्त्र प्राप्तिका लागि विभिन्न कालखण्डमा योगदान पुर्याउने योगप्रसाद उपाध्याय र नुतन थपलियालाई सम्मान गरेको हो । कार्यक्रममा कांग्रेस सभापति शेरबहादुर देउवाले प्रजातन्त्र प्राप्तिका लागि योगदान पुर्याउनेहरूलाई सदैव स्मरण गर्नुपर्ने बताए । उनले प्रजातान्त्रिक योद्धाहरूका बारेमा सबै नेपालीहरूलाई जानकारी गराउनुपर्ने धारणा राखे ।

---

त्यस्तै कांग्रेस उपसभापति धनराज गुरुङले देश निर्माणका लागि अग्रजहरूले खेलेको भूमिकाको स्मरण गर्दै अहिले देश निर्माणका लागि योजनाका साथ अघि बढ्नुपर्ने बेला आएको बताए ।

कांग्रेस महामन्त्री गगनकुमार थापाले भुईँमा बसेकै मान्छेलाई माथि उठाउने र देशको हितमा काम गर्ने कांग्रेसको दायित्व भएको बताए । शनिबारबाट कांग्रेसले समुदायमा कांग्रेस अभियान सुरु गर्ने जानकारी दिँदै उनले सबै क्रियाशील सदस्यलाई वडामा हुने कार्यक्रममा उपस्थित हुन निर्देशन दिए ।

भारतको कलकत्तामा नेपाली राष्ट्रिय कांग्रेसको पहिलो अधिवेशन भएको मिति २००३ माघ १२ गतेलाई आधार मानेर कांग्रेसले हरेक वर्ष स्थापना दिवस मनाउँदै आएको छ । स्थापना दिवस मनाए लगत्तै शनिबारबाट नेपाली कांग्रेसले ‘समुदायमा कांग्रेस’ अभियान पनि सञ्चालन गर्दैछ । ‘समुदायमा जाऔं, जनताका कुरा सुनौं’ नारासहित गाउँ जाने र जनताका सुझाव र गुनासा सुन्ने गरी अभियान सञ्चालन गर्ने कांग्रेसले जनाएको छ ।