कोशी प्रदेशमा भएको फ्लोर क्रस गम्भीर र चिन्ताजनक भएको गठबन्धनकाे निष्कर्ष

काठमाडौँ- सत्ता गठबन्धन दलले राष्ट्रिय सभा सदस्य निर्वाचनका क्रममा कोशी प्रदेशमा भएको फ्लोर क्रस गम्भीर र चिन्ताजनक विषय भएको जनाएका छन् ।

प्रधानमन्त्री निवास बालुवाटारमा मंगलबार बसेको सत्ता गठबन्धन दल बैठकले राष्ट्रिय सभा निर्वाचनको परिणामाका विषयमा प्रारम्भिक छलफल गर्दै कोशी प्रदेशमा भएको भोट क्रस गम्भीर चिन्ताजनक विषय भएको निष्कर्ष निकालेको हो । बैठकपछि कांग्रेस मुख्य सचेतक रमेश लेखकले कोशी प्रदेशमा सत्तापक्षीय दलको एक सिट गुमाएको विषय र अन्य प्रदेशको नतिजाका विषयमा छलफल भएको जानकारी दिए ।

---

कोशी प्रदेशको नतिजाका आधारमा गठबन्धनभित्र कुनै प्रतिकूल प्रभाव नपार्ने उनले बताए । कोशीको विषय प्रधानमन्त्री वा कांग्रेस सभापतिको मात्रै नभएर गठबन्धनका सबैको सरोकारको विषय भएको भन्दै उनले यसमा कसैलाई दोष दिन नहुने उल्लेख गरे ।

राष्ट्रिय सभाका अध्यक्ष चयनका विषय, राजनीतिक एजेण्डालगायतका विषयमा पछि छलफल हुने लेखकले बताए ।