बजेटमा एमालेको असन्तुष्टि, ओली भन्छन्- परामर्श गरेर आएको भए धेरै राम्रो हुनसक्थ्यो

काठमाडौँ- नेकपा एमालेका अध्यक्ष केपी शर्मा ओलीले बजेटमा असन्तुष्टि जनाएका छन् ।

शनिबार बसेको एमालेको संसदीय दलको बैठकलाई सम्बोधन गर्दै अध्यक्ष ओलीले बजेट ल्याउँदा सरकारमा सहभागी दलहरूसँग परामर्श नगरेको भन्दै असन्तुष्टि जनाएका हुन् ।

---

ओलीले बजेट अर्थमन्त्री र माओवादीप्रति ढल्किएको आरोप समेत लगाएका छन् ।

उनले भने, ‘यो बजेट सरकारमा सहभागी दलहरूसँग परामर्श गरेर आएको भए धेरै राम्रो हुनसक्थ्यो । छलफल नहुँदा यो अर्थमन्त्रीको बजेट हो कि अर्थमन्त्रीको पार्टीको बजेट हो कि जस्तो बढ्ता देखिन गएको छ । यसको निर्माण प्रक्रियामा कमजोरी रहँदा गम्भीर त्रुटि भएका छन् ।’

ओलीले सांसदहरूलाई निर्देशन दिँदै बजेटमा रहेका कमजोरी औंल्याउन निर्देशन दिएका छन् । उनले भने, ‘बजेटमा रहेको कुनै पनि कमजोरी औंल्याउनै हुँदैन भन्ने होइन । बजेटमा रहेको कमी माननीयज्यूहरूले आफ्नो क्षेत्र र जिल्लामा प्रदेशमा हिजोको र आजको के कमीकमजोरी छ ? के हुनुपर्थ्यो ? के अझै घट्यो ? यस्ता कुराहरूमा छलफलमा प्रश्न उठाउन सक्नुहुन्छ ।'

बजेटमा कमजोरी भए पनि पारित गर्नुपर्ने अवस्था रहेको उनले बैठकमा बताए ।