'तेजाब आक्रमणको दशकपछि क्षतिपूर्ति रकम दिने'

काठमाडौँ - सांसद बिन्दबासिनी कंसाकारले तेजाब आक्रमणको दशक पछि अदालतको फैसला बमोजिम क्षतिपूर्ति रकम उपलब्ध गराउने निर्णयप्रति सरकारलाई धन्यवाद दिएकी छिन् । 

मंगलबार प्रतिनिधिसभाको बैठकको शून्य समयमा तेजाब आक्रमणबाट ज्यान मार्ने उद्योग मुद्दाको पीडित सांसद कंसाकारले लामो समयपछि सरकारले उपचारमा खर्च भएको रकममध्ये फैसला बमोजिम मनासिव माफिक क्षतिपूर्ति रकम उपलब्ध गराउने निर्णय गरेको भन्दै धन्यवाद दिइन् ।

---

त्यस्तै उनले अपराध भोगेर पाइने शारीरिक, सामाजिक र मानसिक पीडाका साथै समयमा नै न्याय नपाउँदा हुने पिडा झनै कष्टकर हुने भएकाले अदालतले गरेको आदेश/फैसला बमोजिम चाँडो क्षतिपूर्ति पाउने व्यवस्था गर्न सरकारको ध्यानाकर्षण गराइन् । ​

केही दिन अघि बसेको मन्त्रिपरिषद् बैठकले तेजाब आक्रमण पीडित सांसद कंसाकारको उपचारमा खर्च भएको रकममध्ये फैसला बमोजिम मनासिव माफिक क्षतिपूर्ति रकम उपलब्ध गराउने र उक्त रकम प्रतिवादीबाट असुलउपर गरि पीडित राहत कोषमा सोध भर्ना गर्ने व्यवस्था मिलाउने निर्णय गरेको थियो ।