सीमामा तस्करी रोक्न सरकार असक्षम - बामदेव गौतम

काठमाडौँ -राष्ट्रियसभा सदस्य बामदेव गौतमले नेपाल–भारत सीमामा तस्करी रोक्न सरकार असक्षम देखिएको बताएका छन् । 

सिंहदरबारमा बुधबार बसेको राष्ट्रियसभा अन्तर्गतको विकास, आर्थिक मामिला तथा सुशासन समितिमा गौतमले सीमामा खुलारुपमा तस्करी हुदा समेत सरकार यसलाई रोक्न असक्षम देखिएको बताएका हुन् ।

---

नेपालमा उत्पादित सुपारी निर्यातवारे समितिको छलफलमा गौतमले सरकारका रहेका व्यक्तिहरु नै तस्करहरुसंग मिलेको र कहिले पनि समाधान हुन नदिने खेल भएको जिकिर गरे । 

नेपाल–भारत सीमामा देखिएका तस्करी लगाएतका समस्या नियन्त्रण गर्न विधेयक बनाएर कानून तर्जुमा गर्नुपर्नेमा उनले जोड दिए । गौतमले खुला सिमानाको दुरुपयोग सुधार गर्न सरकारले कुनै पहलकदमी लिन नसकेको जिकिर गरे । 

नेपालमा उत्पादन भएको बस्तु खुला सिमानाबाट भन्सार छलेर भारततर्फ लैजाने गरेको र यसका कारण मुलुकको राजस्व समेत गुमेको उनले बताए ।