राष्ट्रवादी दल र शक्तिहरूलाई एकतावद्ध हुन कमल थापाको आग्रह

काठमाडौँ - राप्रपा नेपालका अध्यक्ष कमल थापाले राष्ट्रवादी दल र शक्तिहरूलाई एकतावद्ध हुन आह्वान गरेका छन् । 

सोमबार काठमाडौंमा आयोजित एक कार्यक्रममा बोल्दै थापाले जनताले अहिले विकल्प खोजिरहेको अवस्थामा राष्ट्रवादी शक्तिहरू एकतावद्ध हुनुपर्ने भन्दै एकताका लागि आह्वान गरेका हुन् । उनले विगतका त्रुटि कमजोरीहरूबाट पाठ सिकेर नयाँ ढंगले बलियो वैचारिक राष्ट्रवादी प्रजातान्त्रिक शक्ति निर्माण गर्नुपर्ने धारणा राखे । 

---

राष्ट्रवादी भन्ने दलहरूले आत्मसमीक्षा गर्नुपर्ने उनले बताए । उनले कांग्रेस–एमालेको विरुद्धमा जनता उत्रिएको देखिएपनि उनीहरूकै पक्षमा मत दिन जनता बाध्य भएकाले नयाँ शक्ति आवश्यक रहेको उल्लेख गरे । एकताको पूर्व सर्त आत्मीयता भएकाले विगतमा भएका कमजोरीलाई दोहोर्याएर एकता हुन नसक्ने उनको भनाइ छ । 

उनले विभिन्न प्रकरणमा भइरहेको अनुसन्धान लम्बाउने काम भएको र प्रहरीले पक्राउ गरेकाहरूलाई मानसिक तनाब दिने काम भएको आरोप समेत लगाए ।