जनमत पार्टीले गठन गर्‍यो कार्यदल

काठमाडौं- जनमत पार्टीले मधेसकेन्द्रित दलहरूबीच मोर्चाबन्दी गर्न दुई सदस्यीय कार्यदल गठन गरेको छ । कार्यदलमा पार्टीका केन्द्रीय उपाध्यक्ष अब्दुल खान र प्रवक्ता डा. शरदसिंह यादव रहेका छन् ।

मधेसकेन्द्रित दलहरूबीच संवाद र सहकार्यको पहल गर्न उक्त कार्यदल गठन गरिएको पार्टीद्वारा जारी विज्ञप्तिमा उल्लेख छ । पार्टीको केन्द्रीय सचिवालय समितिको निर्णयानुसार मधेसकेन्द्रित दलहरूबीच मोर्चाबन्दीका निम्ति कार्यदलको जिम्मेवारी तोकिएको हो ।

---

पछिल्लो समय संविधान संशोधनको विषयवस्तु उठाइएको सन्दर्भमा मधेसकेन्द्रित दलहरूको साझा धारणा बनाउने क्रममा सहमतिको पहलका निम्ति कार्यदल गठन गरिएको पार्टीले जनाएको छ ।

यसअघि, लोकतान्त्रिक समाजवादी पार्टी (लोसपा) नेपालले कार्यगत एकता एवं राजनीतिक मुद्दा र सिद्धान्त मिल्नेहरूसँग पार्टी एकीकरणका निम्ति आइतबार समिति गठन गरेको थियो । रासस