काठमाडौँ - जनता समाजवादी पार्टी (जसपा)को अध्यक्ष महन्थ ठाकुर र वरिष्ठ नेता राजेन्द्र महतो समूहमा पहिरो गएको छ । एमाले अध्यक्ष केपी शर्मा ओली सत्ताबाट बाहिरिएपछि ठाकुर समूह छोडेर ६ सांसद संघीय परिषद् अध्यक्ष पूर्वप्रधानमन्त्री डा.बाबुराम भट्टराई र अध्यक्ष उपेन्द्र यादव समूहमा पुगेका छन् ।

पार्टी कार्यालय बालकुमारीमा बसिरहेको संसदीय दल बैठकमा यसअघि ठाकुर समूहमा खुलेका प्रमोद साह, अमृता अग्रहरी, रानी मण्डल र रुही नाज सहभागी भएका छन् । भने सांसदद्वय राजकिशोर यादव र नरमाया ढकालले आउन सहमति जनाएका एक सदस्यले बताए । ‘आज घरायसी काममा रहेकाले दलको बैठकमा सहभागी हुन नपाएको र आगामी बैठकमा आउने प्रतिबद्धता जनाउनु भएको छ,’ ती सदस्यले इकागजसँग भने । 

---

३२ सदस्यीय संसदीय दलमा यसअघि ठाकुर समूहमा २० र यादव समूहमा १२ सांसद थिए । आजको बैठकमा चार जना सहभागी भएका र दुई जनाले प्रतिबद्धता जनाएकाले यादव समूहमा १८ जना पुगेका छन् भने ठाकुर समूहमा सांसद संख्या घटेर १४ जनामा आइपुगेको छ । 

यसअघि यादव समूहमा यादव, डा. भट्टराईसहित राजेन्द्र श्रेष्ठ, रेणु यादव इस्तेह्याक राई, प्रदीप यादव, रामबाबु यादव, रामसहाय यादव, डा. सूर्यनारायण यादव, डा. सुरेन्द्र यादव, लिला सिटौला र महेन्द्र राय यादव थिए । 

दलको बैठकमा संसदीय दलको नेता, प्रमुख सचेतक र सचेतक चयनका विषयमा छलफल भइरहेको छ । त्यस्तै सरकारमा जाने निर्णय गर्ने र सरकारमा जाने मन्त्रीहरुको अनुमोदन गर्ने विषयमा पनि छलफल भइरहेको ती सदस्यले बताए । 

अहिलेसम्म जसपाले संसदीय दलको नेता चयन गर्न सकेको थिएन । यसअघि ठाकुर समूहले एकलौटी रूपमा नेता महतोलाई संसदीय दलको नेता बनाएको थियो । त्यो निर्णयलाई यादव समूहले स्वीकार गरेको छैन ।  जसपाका ३४ संसद् रहेकामा हरिनारायण रौनियार र रेशमलाल चौधरी निलम्बनमा छन् ।