गगन थापा भन्छन्,  ‘सभापतिको साझा उम्मेदवारका लागि प्रयास जारी छ’

काठमाडौँ– नेपाली कांग्रेसका नेता गगन थापाले संस्थापनइतरबाट सभापतिको साझा उम्मेदवारका लागि प्रयास भइरहेको बताएका छन् । आज विहानदेखि नै थापालाई उद्धृत गर्दै विभिन्न सञ्चारमाध्यमले थापाले शेखर कोइरालालाई समर्थन दिएको भन्दै समाचार प्रकाशन/प्रसारण हुन थालेपछि थापाको सचिवालयले त्यसको खण्डन गरेको छ । 

गगन थापाका स्वकीय सचिव प्रताप पौडेलले थापाले उक्त अभिव्यक्ति नदिएको बताए । ‘उहाँहरू सहमतिको प्रयास गरिरहनुभएको छ,’ उनले भने, ‘संस्थापनइतरबाट सभापतिको साझा उम्मेदवारका लागि अन्तिम घडीसम्म प्रयास गर्ने थापाको भनाइ छ ।’

---

संस्थापनइतरका नेताहरू सभापतिको साझा उम्मेद्वार चयनका लागि श्रृंखलावद्ध बैठक बसिरहेका छन् । तर साझा उम्मेदवारमा सहमति हुन सकेको छैन ।

सभापतिका दाबेदार मानिएका महामन्त्री शशांक कोइराला र वरिष्ठ नेता रामचन्द्र पौडेलले दाबी छाडे पनि शेखर कोइराला र प्रकाशमान सिंहले आ–आफ्नो दाबी राखिरहेका छन् । जसका कारण संस्थापनबाट साझा उम्मेद्वार चयन गर्न सकस भइरहेको छ ।