देउवा प्यानलमा डा. शशांक कोइराला केन्द्रीय सदस्य, रामचन्द्र मतदान गर्न नआउने

काठमाडौँ– नेपाली कांग्रेसको १४औं महाधिवेशनमा सभापतिका उम्मेदवार समेत रहेका शेरबहादुर देउवाले हिजो राती आफ्नो सिंगो प्यानल घोषणा गरेका छन् । प्रारम्भमा पदाधिकारीको नाम सार्वजनिक गरिएको थियो । 

आइतबार राती केन्द्रीय सदस्यहरूको समेत नाम सार्वजनिक गरिएको छ । जसमा हालका महामन्त्री डा. शशांक कोइरालाको नाम केन्द्रीय सदस्यमा समावेश छ । हुन त साझा उम्मेदवार हरेक प्यानलमा पर्ने सम्भावना हुन्छन् । तर आफ्नै दाजु शेखर कोइराला सभापतिको उम्मेदवार रहँदारहँदै शशांक किन देउवाको प्यानलमा बसे भन्ने प्रश्न उठेको छ । 

---

महाधिवेशन घोषणा हुँदा एक ठाउँमा रहेका डा. शेखर, डा. शशांक र सुजाता कोइराला अहिले तीन तिर पुगेका छन् । सुजाता सभापतिका उम्मेदवार प्रकाशमान सिंहको तर्फबाट उपसभापतिको उम्मेदवार छिन् । 

त्यस्तै देउवाले आइतबार दुईओटा रणनीतिक मुभ गरेका छन् । शशांकको समर्थन प्राप्त गर्नुअघि उनीसँग बालुवाटरमा देउवाले भेटेका थिए । संखुवासभाका सभापति एवं शशांक निकट व्यवसायी दीपक खड्का र शशांकका स्वकीय सचिव भरत तिवारीले शशांकलाई देउवासँग भेटाएका थिए । देउवाले आफूपछि सभापतिमा शशांकलाई सहयोग गर्ने वचन दिइएको बताइन्छ । 

त्यस्तै देउवाले आइतबार नै वरिष्ठ नेता रामचन्द्र पौडेललाई बोहोराटारमा पुगेर भेटेका छन् । देउवासँगको भेटपछि रामचन्द्रले आफू महाधिवेशनमा मतदान नै गर्न नआउने बताएका छन् । देउवाले आगामी निर्वाचनमा नेपाली कांग्रेसले बहुमत ल्याउने र पौडेललाई राष्ट्रपति बनाउने आश्वासन दिएको बताइन्छ । देउवासँगको भेटमा रामचन्द्रका छोरा चिन्तन पौडेल सहित सम्पूर्ण परिवारका सदस्यले हँसिलो मुद्रामा तस्बिर खिचाएको देखिन्छ ।