देउवा भन्छन्, ‘माधवजीलाई त्यत्तिकै छोडेर धोखाधडी गर्न सकिन्नँ’

काठमाडौँ– सत्तारुढ गठबन्धनलाई निरन्तरता दिने कि एमालेसँग नीतिगत सहकार्य गरी सबै निर्वाचन गराउने र अमेरिकासँगको एमसीसी सम्झौता पनि अघि बढाउने भन्ने विषयलाई लिएर सरकारको नेतृत्वकर्ता नेपाली कांग्रेसभित्र तीव्र ध्रुवीकरण भएको छ ।

प्रधानमन्त्री शेरबहादुर देउवा पनि गठबन्धनप्रति धेरै प्रतिवद्ध देखिदैंनन् । अघिल्लोपटक २०७४ को आम निर्वाचनमा पनि सत्ता साझेदार माओवादी केन्द्रले देउवालाई धोका दिएकाले माओवादी केन्द्रसँगको सम्बन्धलाई लिएर उनी गम्भीर छैनन् । ‘तर माधवजीलाई संरक्षण गर्नुपर्छ भन्नेमा शेरबहादुर दाई दृढ हुनुहुन्छ,’ नेपाली कांग्रेसका एक नेताले देउवालाई उद्धृत गर्दै भने, ‘माधवजीलाई त्यत्तिकै छोडेर धोखाधडी गर्न सकिन्नँ ।’ 

---

यद्यपि नेपाल कम्युनिष्ट पार्टी एकीकृत समाजवादीकै नेता पूर्वप्रधानमन्त्री झलनाथ खनालले भने गठबन्धनप्रति देउवा प्रतिवद्ध नभए एमालेसँग सहकार्य हुनसक्ने संकेत गरेका छन् । तर देउवाले भने ‘माधवजीसँग घोषित नभए पनि निर्वाचनमा अघोषित सहकार्य गरेर जाने’ भनेका छन् । 

‘गठबन्धन भनेर अब चुनावमा घोषित गठबन्धन हुँदैन,’ ती नेताले भने, ‘शेरबहादुर दाईले पनि राष्ट्रियसभा निर्वाचनसम्म मिलेर जाने भन्नुभएको हो । त्यसपछिका चुनावमा घोषित सहकार्य गर्ने भनेर सहमति छैन ।’ 

मओवादीले आफ्नो राजनीतिक स्वार्थका लागि च्याँखे दाउ थापिरहेको र विश्वासिलो पनि नभएकाले एमालेसँग नीतिगत सहकार्य गरेर समयमा सबै निर्वाचन गराउनुपर्ने मत कांग्रेसमा बलियो हुन थालेको छ । देउवाले अमेरिकासँगको एमसीसी सम्झौता अनुमोदन गराउन एमालेसँग सहकार्य गर्ने भए पहिला माधव नेपाल समूहका १४ सांसदलाई वैधानिकता दिन नमिल्ने र सभामुख अग्नि सापकोटालाई हटाउनुपर्ने माग ओलीले गर्दै आएका छन् । 

ओलीले प्रष्ट कुरा नगरेकाले देउवामा ओली र दाहाल फेरि पनि तालमेल गर्ने हुन् कि भन्ने भय छ । ओली र दाहालबीच पनि दूतमार्फत् गोप्य वार्ता भइरहेको एमाले पोलिटब्यूरो सदस्य महेश बस्नेतले केही दिन अघि सार्वजनिक गरेका थिए । 

माधव नेपाललाई कांग्रेसले साथ दिने कुरामा ओलीको असन्तुष्टी रहेकाले पनि ओली र देउवाबीचको नीतिगत सहकार्यमा अवरोध भइरहेको बुझिएको छ । ओलीले आइतबार बालुवाटारमा भएको बैठकमा ‘माधव नेपाललाई नबोलाउने शर्तमा मात्र आउने’ बताएका थिए । 

त्यसो त माओवादी केन्द्र र एकीकृत समाजवादीबीच घोषित सबैखाले सहकार्य रहेको स्थितिमा नेपाललाई छाडेर दाहाल लुसुक्क ओलीतिर नमिल्लान् भन्ने तर्क पनि बलियो छ तर बालुवाटार स्रोत भन्छ, ‘दाहालको भर छैन । उनी आफ्नो राजनीतिक फाइदाका लागि जेसुकै पनि गर्न सक्छन् ।’ 

गठबन्धनका साझेदारहरू नेकपा माओवादी केन्द्र र एकीकृत समाजवादीले निर्वाचन घोषणा भएकाले अब एमसीसी संसदमा टेबुल गर्ने विषय निर्वाचन अघिका लागि बन्द भैसकेको भनेका छन् । प्रमुख प्रतिपक्षी दलका नेता केपी शर्मा ओलीले एमालेका शर्त मञ्जुर गरी संसद खोल्ने वातावरण बनाए एमसीसीका सम्बन्धमा संसदमै निर्णय लिने बताएका छन् ।