काठमाडौँ - सञ्चार तथा सूचना प्रविधि मन्त्री ज्ञानेन्द्रबहादुर कार्कीले एमसीसी परियोजना ५ वर्षभित्रै सक्ने सरकारको लक्ष्य रहेको बताएका छन् । बिहीबार प्रधानमन्त्री निवास बालुवाटारमा भएको सत्तारूढ चार दलको बैठकपछि बोल्दै मन्त्री कार्कीले मसीसी परियोजनालाई ५ वर्षभित्रै सक्ने सरकारको लक्ष्य रहेको बताएका हुन् । 

उनले ५ वर्षभित्रमा करिव ३१५ मिटर ट्रान्समिसन लाइन र अन्तर्राष्ट्रिय स्तरको सडक निर्माण गर्ने लक्ष्य पूरा गरेर मुलुकको गरिबी निवारण र देशलाई दिगो आर्थिक विकासतर्फ अघि बढाउनतर्फ सरकार रहेको बताए। एमसीसी पास गर्न सहयोग गर्ने राजनीतिक दलहरुले अब एमसीसी समयमै सक्नको लागि पनि एकजुट भएर सहयोग गर्न उनले आग्रह गरे।

---

मन्त्री कार्कीले संसद् अवरोध हटाउन प्रमुख प्रतिपक्ष दल नेकपा एमालेसँग आग्रह गर्ने बताए । उनले आजको बैठकमा अबको विकसित राजनीतिक परिस्थितिको बारेमा सरकारको भुमिका र संसद् अवरोधका बारेमा छलफल केन्द्रित भएको बताए । मन्त्री कार्कीले बैठकमा नागरिक विधेयक, हवाइ उड्डयन जस्ता विधेयकहरूको बारेमा पनि छलफल केन्द्रित भएको बताए । त्यस्तै आजको बैठकमा आगामी आर्थिक वर्षको बजेटका विषयमा पनि छलफल भएको मन्त्री कार्कीले बताए ।

‘एमसीसी संसद्‍बाट करिब एक मतले अनुमोदन भइसकेपछि ४ दलको बैठक भयो । बैठकमा प्रधानमन्त्रीज्यूले एमसीसी अनुमोदनका निमित्त योगदान गर्नुभएका सबैलाई धन्यवाद दिनुभयो,' उनले भने, 'विकसित राजनीतिक परिस्थितिको बारेमा पनि छलफद्य भयो । एमसीसी मेलम्ची जस्तो बनाउन सक्दैनौँ । पाँच वर्षमा हामीले यसलाई सम्पन्न गर्न सकेनौँ भने यो रकम फिर्ता जान्छ ।’