कांग्रेस केन्द्रीय समिति बैठक सानेपामा जारी

काठमाडौँ - नेपाली कांग्रेसको केन्द्रीय समिति बैठक जारी छ । दुई बजेदेखि बोलाइएको बैठक चार बज्न लागेपछि मात्रै बसेको हो । 

जारी बैठकमा स्थानीय तहको निर्वाचन र संसदीय बोर्ड गठनका बारेमा केन्द्रित हुने बताइएको छ । 

---

 बैठकमा गठबन्धन, उम्मेदवारको मापदण्ड र प्रारम्भिक समीक्षा लगायतमा छलफल हुने नेताहरुले बताएका छन् ।

कांग्रेसले २९ फागुनदेखि थालेको घरदैलो अभियान २९ चैतमा सकिँदैछ । हालसम्मको प्रारम्भिक समीक्षा पनि हुनेछ ।

यसअघि केन्द्रीय कार्यलयमा सभापति शेरबहादुर देउवा विरुद्ध डा. शेखर कोइराला समूहका विद्यार्थी तथा तरुणहरुले नाराबाजी गरेका थिए । 

गत बुधबार मनोनयन गरिएका भ्रातृ संस्था तरुण दल र विद्यार्थी संघमा सभापति देउवाले एकलौटी निर्णय गरेको भन्दै उनीहरुले विरोध प्रदर्शन गरेका हुन् ।