कांग्रेस केन्द्रीय सदस्यहरूले भने, ‘गठबन्धन गरे कांग्रेसको हालत भारतमा कांग्रेसआईको जस्तै’

काठमाडौँ– नेपाली कांग्रेसको केन्द्रीय समितिको बैठकमा चुनावी गठबन्धनको विपक्षमा मत जाहेर भएको छ । कांग्रेस केन्द्रीय समिति बैठकमा गण्डकी र लुम्बिनी प्रदेशका सभापतिले भने, ‘गठबन्धन गर्दै जाने हो भने हाम्रो हालत भारतको ‘कांग्रेस आइ’को झैं हुनेछ ।’ 

प्रदेश १ र बागमती प्रदेशका सभापतिले पनि केन्द्रबाट घोषित गठबन्धन गर्न नहुनेमा जोड दिएका छन् । ‘गठबन्धन गर्दा स्थानीय आवश्यकता अनुसार गर्नुपर्छ,’ बाग्मती प्रदेशका सभापति इन्द्र बानियाँले भने । 

---

‘गठबन्धन किन गर्ने, गर्दा के हुन्छ ? केन्द्रबाटै गठबन्धन गर्ने कि स्थानीय आवश्यकता अनुसार गर्ने ?,’ भन्ने विषयमा आजको बैठक केन्द्रीत रहेको बानियाँले बताए । 
कर्णाली प्रदेशका सभापतिले माओवादीको प्रस्ताव अनुसार गठबन्धन गर्ने हो भने धेरै जिल्लामा कांग्रेस शून्य हुने बताएका छन् । माओवादीले ज–जसले जहाँ जितेको हो त्यो ठाउँ आफूसँगै राखेर एमालेले जितेका स्थानीय तहमा माओवादी केन्द्र र नेकपा समाजवादीबीच भागबण्डा गर्नु पर्ने बताउँदै आएको छ ।

त्यसो कर्दा कर्णालीका धेरै जिल्लामा कांग्रेस शून्य हुने कर्णाली प्रदेशका सभापतिको भनाई छ । नेपाली कांग्रेसका केन्द्रीय सदस्य नैनसिंह महरले पार्टीको संसदीय बोर्ड न्यायसंगत देखिनेगरी बन्नु पर्ने बताएका छन् । कांग्रेस केन्द्रीय समिति बैठकमा बोल्दै नेता महरले आफ्ना मानिसको मात्र नाम खल्तिबाट बोक्ने प्रवृतिको अन्त्य भएर संसदीय बोर्ड न्यायसंगत देखिनुपर्ने धारणा राखेका हुन् ।

केन्द्रीय समिति बैठकमा महरले खल्तीका मान्छे बोक्ने प्रवृत्ति त्यागेर सिंगो पार्टीका बारेमा सोच्न आग्रह गरे । उनले पछिल्लो समय जनताको आकर्षण कांग्रेसप्रति बढेको समेत उल्लेख गरे । 

‘घर–घर जाऔं काँग्रेस जिताऔं अभियानले साच्चै जनतामा उत्साह ल्याएको छ । म कञ्चनपुरका ९२ वडा र ९ पालिकामा पुगेँ । त्यहाँ हाम्रो अभियानले सार्थकता पाएको देखियो । अन्य पार्टी त्यागेर काँग्रेस प्रवेश गर्नेहरूको संख्या पनि बढ्दो छ,’ उनले भने ।

काँग्रेसको कार्यक्रममा हुने उपस्थिति देखेर एमालेलगायतका पार्टीका नेताहरू छटपटाइरहेको आफूले पाएको महरको भनाई छ । 

‘कम्युनिस्टहरू झुटको राजनीति गर्ने चरित्र उदांगो भएकाले पनि जनताको विश्वास कांग्रेसप्रति रहेको उनले बताए । जनताको त्यो विश्वासलाई कांग्रेसले जीवन्त पार्नुपर्छ,’ उनले भने, ‘तीनै तहका निर्वाचनमा कांग्रेस एकढिक्का भएर जानुपर्ने र पार्टीमा बेमेल भए नेतृत्वले सम्बोधन गर्नुपर्छ ।’ 

अन्य केन्द्रीय सदस्यहरूले पनि पार्टीभित्र सबैको एकमत बनाएर अन्य दलसँग गठबन्धन गर्नुपर्ने धारणा राखेका छन् । उनले गठबन्धन सिद्धान्तको आधारमा नभएर आवश्यकताको आधारमा हुनुपर्ने बताएका छन् ।

उनीहरूले निर्वाचन घोषणापत्रमा संविधानले ग्यारेन्टी गरेको निःशुल्क स्वास्थ्य र शिक्षालाई समावेश गर्नुपर्ने बताएका छन् । साथै केन्द्रीय सदस्यहरूले कांग्रेसलाई जीवन्त र युवाको कांग्रेस बनाउनुपर्नेमा जोड दिएका छन् ।