हुम्लाका पाँच सय ९८ उम्मेदवार कारबाहीमा

सिमकोट- हुम्लाका पाँच सय ९८ जना जनप्रतिनिधि कारबाहीमा परेका छन् । स्थानीय तह निर्वाचनको खर्च विवरण नबुझाउने निर्वाचित अध्यक्ष, उपाध्यक्षसहित पाँच सय ९८ जना जनप्रतिनिधि कारबाहीमा परेका हुन् ।

निर्वाचन आयोगको कारबाहीमा पर्नेहरूमा अदानचुली गाउँपालिकाका अध्यक्ष मोहनविक्रम सिंह, सर्केगार्ड गाउँपालिकाका अध्यक्ष ठानबहादुुर रोकाया, सिमकोट गाउँपालिकाका अध्यक्ष विजय भण्डारी र नाम्खा गाउँपालिकाका अध्यक्ष प्रेमबहादुर लामा रहेका छन् ।

---

त्यसैगरी निर्वाचन खर्च विवरण नबुझाउनेमा चारजना गाउँपालिकाका निर्वाचित उपाध्यक्षसमेत रहेका छन् । अदानचुली गाउँपालिकाका उपाध्यक्ष कर्ण रोकाय, सर्केगार्ड गाउँपालिकाका उपाध्यक्ष चन्द्रसिंह कार्की, खार्पुनाथ गाउँपालिकाका उपाध्यक्ष ज्ञानबहादुर सिंह र सिमकोट गाउँपालिकाकी उपाध्यक्ष सुशीला भाम रोकाया छन् । 

खर्च विवरण नबुझाउने अध्यक्ष उपाध्यक्षबाहेक अन्य पाँच सय ९० जनालाई पनि नियमानुसार आयोगले जरिवाना गरेको छ । आयोगले गरेको जरिवाना कारबाहीअनुसार अध्यक्ष उपाध्यक्ष पदमा उम्मेदवारी मनोनयन गरेका उम्मेदवारलाई तीन लाख ५० हजार र अन्य वडाध्यक्ष, महिला, दलित महिला सदस्य र अन्य सदस्यका लागि एक लाख ५० हजार रुपैयाँ जरिवाना तोकिएको छ । 

जिल्ला निर्वाचन कार्यालय हुम्लाका निमित्त प्रमुख श्यामबहादुर रानाका अनुसार २० जना अध्यक्ष तथा उपाध्यक्षका निर्वाचित र पराजित उम्मेदवारले निर्वाचन खर्च विवरण बुझाएका छैनन् । आयोगले जरिवाना बापतको रकम राजश्व खातामा जम्मा गर्न सार्वजनिक सूचना जारी गरेको छ ।