विजेनस हुँदाहुँदै बागमती प्रदेश सभाको हिउँदे अधिवेशन अन्त्य

हेटौंडाः बागमती प्रदेश सरकारले विजनेस हुँदाहुँदै प्रदेश सभाको अधिवेशन अन्त्य गरेको छ । आज बसेको प्रदेश मन्त्रिपरिषद् बैठकले हिउँदे अधिवेशनको अन्त्य गर्न प्रदेश प्रमुखलाई सिफारिस गरेको थियो । प्रदेश प्रमुख विष्णु प्रसाईले आज राति १२ बजेबाट लागू हुनेगरी अधिवेशन अन्त्य गरेका छन् । 

प्रदेश सभा सञ्‍चालन गर्न पर्याप्त विजनेस हुँदाहुँदै प्रदेश सभाको अन्त्य गरिएको सभामुख सानुकुमार श्रेष्ठले बताएका छन् । प्रदेश सभामा सडकसम्बन्धी विधेयक समितिमा छ भने पर्यटनसम्बन्धी विधेयक टेबुल हुन बाँकी थियो । यस्तै महालेखापरीक्षकको प्रतिवेदन, लोकसेवा आयोगको प्रतिवेदन, न्यायाधिवक्ता कार्यालयको प्रतिवेदन संसदमा पेस हुन नसकेको सभामुख श्रेष्ठले जानकारी दिए ।

---

पटक-पटक संसद् चल्ने वातावरण नबन्दा प्रदेश सभाले नियमित कार्य अघि बढाउन नसकेको उनको भनाइ छ । प्रदेश सभाको सातौं अधिवेशनको अन्त्य गर्नु अगाडि सोमबार मुख्यमन्त्री डोरमणि पौडेलले ललितपुरमा सर्वदलीय बैठक बोलाएका थिए । बैठक माओवादी, कांग्रेस, विवेकशील साझा पार्टीले बहिस्कार गरेका थिए । 

बैठकमा सहभागी नेपाल मजदुर किसान पार्टीका प्रदेश सांसद सुरेन्द्रराज गोसाईले अधिवेशन अन्त्यबारे छलफल नभएको जानकारी दिए । उनले संसद् भनेकै प्रतिपक्ष र विपक्षको रहेको भन्दै संसद् चल्ने वातावरण सरकारले बनाउनुपर्ने बताए । प्रदेश सभा संचालन गर्न नसक्नु सरकारको कमजोरी भएको उनको भनाइ छ । उनले बागमती प्रदेश सरकार संसद्‍बाट भाग्‍न खोजेको आरोप लगाए । संसद्मा विद्युतीय बस खरिद प्रक्रिया रोक्न माग गर्दै र मदन भण्डारी फाउन्डेशनलाई ५० लाख दिने मन्त्रिपरिष्दको निर्णय फिर्ता लिन प्रमुख प्रतिपक्ष दल माओवादीले संसद अवरुद्ध पार्दै आएको थियो ।
 
सांसद गोसाईले प्रदेश सरकारले केन्द्र सरकारको सिको गर्दा संघीयता अगाडी नबढ्ने ठोकुवा गरे । उनले प्रदेश सरकार फेल हुने दाबी समेत गरे । ‘कोभिडको यस्तो समयमा अधिवेशन अन्त्य गर्नु भनेको जनताको आवाज सरकारले नसुन्‍नु हो,’ उनले भने । प्रदेश सरकारले जनताको आवाज सुन्‍ने वातावरण मिलाउने समयमा अधिवेशन अन्त्य गरेकोमा उनले दुःख व्यक्त गरे ।
 
कांग्रेसका सचेतक छिरिङ दार्जे लामाले भने प्रदेश सरकारले हिउदे अधिवेशनको अन्त्य गर्ने अनुमान नै नगरेको बताए । यसअघि उनले सोमबार बोलाइएको सर्वदलीय बैठकमा ढिलो खबरको आएको र अन्य दलको नेताहरू सहभागी नहुने भएपछि नगएको जानकारी दिए । उनले बैठक सार्न आग्रह गरेको बताए । 
प्रमुख प्रतिपक्ष दल मओवादीले प्रदेश सरकारविरुद्ध अविश्‍वासको प्रस्ताव लिएर जानेबारे कुनै पनि समन्वय कांग्रेससँग नगरेको उनले बताए । बागमती प्रदेश सभामा माओवादीले सरकारलाई दिएको समर्थन फिर्ता लिएर मुख्यमन्त्री पौडेलविरुद्ध अविश्वासको प्रस्ताव दर्ता गर्ने र कांग्रेसले साथ दिने अनुमान थियो । 

बागमती प्रदेशमा एमाले एक देखिए पनि माधव नेपाल समूह र ओलि समूहले छुट्टाछुट्टै गतिविधिहरु अगाडि बढाउँदै आइरहेका छन् । बागमती प्रदेश सभामा नेकपा एमालेको ५७ सांसद छन् । माओवादी २३, कांग्रेस २२, विवेकशील साझा ३, नेमकिपा २, राप्रपा २ र स्वतन्त्र १ सांसद छन् ।