प्रचण्ड सहभागी हुने चुनावी सभा नजिक व्यक्तिले बाेकेकाे बम विस्फोट

 विराटनगर । भोजपुरको पौवादुम्बा गाउँपालिकास्थित तिवारी भञ्ज्याङमा आयोजित सत्ता गठबन्धनको चुनावी सभा नजिकै बम बिस्फोट भएको छ । सभालाई सम्बोधन गर्न नेकपा माओवादी केन्द्रका अध्यक्ष पुष्पकमल दाहाल हेलिकप्टर चढेर पुग्ने कार्यक्रम थियो ।

तर प्रचण्ड पुग्नु अगावै सभास्थल नजिकै भएका विष्फोटमा बम बोक्ने व्यक्ति भोजपुरको अरूण गाउँपालिका–४ का सुमन श्रेष्ठ घाईते भएको १ नम्बर प्रदेश प्रहरी कार्यालय विराटनगरले जनाएको छ । प्रदेश प्रहरी कार्यालयका प्रवक्ता नविनराज राईले श्रेष्ठले आफैंले झोलामा बोकेको बम विष्फोट भएको जानकारी दिए । बिस्फोटबाट उनको दुवै खुट्टामा गहिरो चोट लागेको जनाइएको छ । प्रहरीले बिस्फोट भएको स्थल नजिकका क्षेत्रमा पनि सर्च गरिरहेको जनाइएको छ ।

---

बम बोक्ने श्रेष्ठका बारेमा थप अनुसन्धान भइरहेको जनाइएको छ । घाइते भएका उनलाई स्थानीय क्लिनिकमा उपचार भइरहेको प्रहरीले जानकारी दिएको छ । धरानको चुनावीसभालाई सम्बोधन गरेर प्रचण्ड हेलिकप्टरबाटै भोजपुर पुग्ने कार्यक्रम रहेको र अहिले उनी हेलिकप्टरबाटै कार्यक्रम स्थल समेत पुगिसकेको जनाइएको छ ।