को हुन् शिक्षकदेखि मुख्यमन्त्री हुँदै पाँचौँ पटक सङ्घीय संसदमा छिरेका पाण्डे ?

काठमाडौँ । धादिङ निर्वाचन क्षेत्र नं १ बाट नेकपा (एकीकृत समाजवादी)का उम्मेदवार राजेन्द्रप्रसाद पाण्डे निर्वाचित भए । झण्डै आठ हजार मतान्तरहित उनी निर्वाचित भएका हुन् । पाण्डेले ३५ हजार नौ सय ३४ मत प्राप्त गरे । निकटतम् प्रतिद्वन्द्वी नेकपा (एमाले)का भूमिप्रसाद त्रिपाठीले २७ हजार नौ सय ५३ मत प्राप्त गरे।  

विसं २०१३ जेठ २८ गते धादिङको गजुरी–८ छेपाङमा जन्मिएका पाण्डे २०३२ सालदेखि राजनीतिमा प्रवेश गरेका हुन् । पाण्डे विद्यार्थी राजनीतिबाट उदाएङ्का हुन् । तत्कालीन पञ्चायती व्यवस्थाविरुद्ध आन्दोलन गर्दा उनले एक वर्ष भूमिगत र चार वर्ष छ महिना बन्दी जीवन बिताए । उनले १० वर्ष आदर्श माध्यमिक विद्यालय, गजुरीमा शिक्षण गरेका थिए ।    
    
बुबा स्व नेत्रराज र आमा स्व मनमायाका जेठो छोराका रुपमा जन्मिएका पाण्डेले सीता थपलियासँग विवाह गरे । । पाण्डेले त्रिभुवन विश्वविद्यालयबाट ग्रामीण विकास विषयमा स्नातकोत्तर उतीर्ण गरेका छन् ।    
    
पाण्डे २०४८, २०५१, २०५६ र २०७० सालको संसदीय निर्वाचनमा धादिङबाट निर्वाचित भए ।  विसं २०६४ मा संविधानसभा सदस्यको निर्वाचनमा भने पराजित भए। विसं २०५१ मा पाण्डे नेकपा (एमाले)को संसदीय दलको सचेतक, २०५३ सालमा प्रमुख सचेतक र २०६३ सालमा स्थानीय विकासमन्त्री बने । विसं २०५० मा उनी एमालेको बागमती अञ्चल सचिव र २०५५ सालमा केन्द्रीय सदस्यमा निर्वाचित भएका थिए ।    
    
 पाण्डे २०७० सालको संविधानसभा निर्वाचनमा धादिङ क्षेत्र नं ३ बाट प्रत्यक्ष निर्वाचित भएका थिए । विसं २०७४ मा उनी धादिङ निर्वाचन क्षेत्र नं १ प्रदेशसभा (१) बाट बागमती प्रदेशसभामा निर्वाचित भएका थिए । विसं २०७८ मा उनी बागमती प्रदेशको मुख्यमन्त्री बनेका थिए । एमालेको विभाजनसँगै उनी नेकपा (एकीकृत समाजवादी)को उपाध्यक्ष छन् ।    
    
 पाण्डेको ‘चीन भ्रमण एक अनुभव अनेक’ कृति प्रकाशित छ । उनले चीन, भारत, बेलायत, फ्रान्स, स्वीटजरल्याण्ड, बेल्जियम, हल्याण्ड, लक्जम्वर्ग, इटली, अमेरिका, भेनेजुएला, ब्राजिल, दक्षिण कोरिया, जापान र अष्ट्रेलियाको भ्रमण गरेका छन् । 

---