भक्तपुरमा सडक निरीक्षणमा पुगेका मन्त्री श्रेष्ठसँग स्थानीयको चर्काचर्की

काठमाडौँ- भक्तपुरको कमलविनायक–नगरकोट सडकखण्ड अनुगमन गर्न पुगेका उपप्रधान एवं भौतिक पूर्वाधार तथा यातायातमन्त्री नारायणकाजी श्रेष्ठसँग स्थानीयहरू आक्रोशित भएका छन् ।

बिहीबार मन्त्री श्रेष्ठ र नेपालका लागि भारतीय राजदूत नवीन श्रीवास्तवसहितको टोली उक्त सडकखण्डको स्थलगत निरीक्षणका लागि पुग्दा स्थानीयहरूले वर्षौंदेखि आश्वासन मात्रै बाँडेर सडक निर्माण सम्पन्न नगरेको भन्दै मन्त्रीलाई नै घेरेर आक्रोश पोखेका हुन् ।

---

बिहीबार मन्त्री श्रेष्ठसहित भौतिक पूर्वाधार तथा यातायात मन्त्रालयका सचिव, सडक विभागका डिजी, सम्बन्धित आयोजना प्रमुख, ठेक्का पाएका निर्माण कम्पनीका प्रतिनिधि थिए । अनुगमनका क्रममा मन्त्री श्रेष्ठलाई घेरेका स्थानीहरूले ९ वर्षसम्म बाटो नबनाएको र रातदिन सुत्नसमेत नदिएको आरोप लगाए । स्थानीयहरूले मन्त्री आउने भनेपछि पानी हालेर बाटोमा धुलो उड्न रोकेको भन्दै आक्रोश पोखे ।

उनीहरूले खराब बाटोकै कारण आफन्त गुमाएको भन्दै जनतालाई गुमराहमा कहिलेसम्म राख्ने भन्दै प्रश्न गरे । उनीहरूले कालोसूचीमा राखेर कारबाही गर्नुपर्ने ठेक्का कम्पनीहरूलाई सरकारले किन पक्षपोषण गरिरहेको छ ? भन्दै प्रश्न समेत गरेका थिए । उनीहरूले अहिले गरिरहेको ठेकेदार कम्पनीको ठेक्का रद्द गर्न पनि माग गरेका छन् । 

मन्त्रीले स्थानीयहरूको माग सम्बोधन हुने र समयमा नै अब काम सक्ने आश्वासन दिए । उनले हेलचक्र्याइँ भएको तर अबका दिनमा नहुने प्रतिबद्धता जनाए ।

टोलीले कमलविनायक, भत्केको पाटीदेखि नगरकोटसम्मै पुगेर सडकको स्थलगत अनुगमन गरेको हो । सैलुङ कन्स्ट्रक्सनले कमलविनायक–नगरकोट सडकखण्ड ठेक्का पाएको छ । तर, पटक–पटक म्याद थप्दा पनि काम सम्पन्न हुन सकेको छैन । सडक निर्माणमा भएको ढिलासुस्तीका कारण जनताले वर्षौंदेखि सास्ती खेपिरहेका छन् ।