हेटौंडा : राष्ट्रिय सभाको उपनिर्वाचनको लागि शुक्रबार दिउँसोसम्म तीन जनाले उम्मेदवारी दर्ता गराएका छन् । सत्तारुढ एमालेबाट रामबहादुर थापा, स्वतन्त्र डा.खिमलाल देवकोटा र नेपाल मजदुर किसान पार्टी (नेमकिपा)बाट कृष्णबहादुर तामाङले उम्मेदवारी दर्ता गराएका हुन् ।  

उम्मेदवारी दर्ता गराएसँगै दुई 'हेवीवेट' उम्मेदवार आरोप प्रत्यारोपसँगै आआफ्ना एजेण्डा राख्न थालेका छन् । तर, नेमकिपाका उम्मेदवार आफूलाई जित र हारसँग सरोकार नरहेको प्रष्ट पारेका हुन् । उम्मेदवारी दर्ता गराएसँगै तामाङले हारजित जे भए पनि आफू पार्टीको निर्देशन अनुसार चल्ने बताए । पार्टीको निर्देशन अनुसार आफूले उम्मेदवारी दिएको भन्दै देश र जनताको लागि काम गर्ने प्रतिवद्धता उनले जनाए । 

---

अर्कोतर्फ गृहमन्त्री थापाले आफ्नो जित सुनिश्चित रहेको दाबी गरेका छन् । उनले बागमती प्रदेशमा भएकोे ९ हजार ५६४ मतमध्ये पाँच हजार १३० मत एमालेको रहेको भन्दै जित सुनिश्चत रहेकोे दाबी गरेका हुन् । त्यस्तै स्वतन्त्र उम्मेदवारी दिएका डा.देवकोटाले आफ्नो पछाडि नेकपा माओवादी केन्द्र र कांग्रेस मात्र होइन, सिंगो मुलक नै साथमा रहेको बताए । अहिले संविधान र व्यवस्थालाई सरकारले धेरै कमजोर बनाएको उनले आरोप छ । 

‘यो व्यवस्था ६२/६३ जनआन्दोलन, माओवादी आन्दोलन, जनजाती आन्दोलन लगायत विभिन्न आन्दोलहरूबाट प्राप्त भएको हो’, उनले भने, ‘प्रधानमन्त्रीबाटै संविधानको हत्या गर्ने काम भयो ।’ शुक्रबार दिउँसो ४ बजेसम्म मनोनयन दर्ता गराउने समय छ । अहिलेसम्म ३ जनाको मात्रै उम्मेदवारी परेको हो ।