प्रदेश १ का सबै अस्पताललाई कोभिड अस्पताल बनाउन कांग्रेसको माग

विराटनगर : प्रदेश १ का सबै सरकारी अस्पतालहरुलाई कोभिड–१९ अस्पताल बनाउन नेपाली कांग्रेस प्रदेश संसदीय दलले माग गरेको छ । आइतबार प्रदेश सभा सचिवालयमा पत्रकार सम्मेलन गर्दै प्रमुख सचेतक केदार कार्कीले सरकारको संवेदनहीनताका कारण अहिले भयाभह अबस्था आएको आरोप लगाए । 

‘अब हामीसँग कुनै समय र उपाय छैन त्यसैले जनतालाई मृत्यु हुनबाट जोगाउने हो भने तुरुन्त सबै सरकारी अस्पतालहरुलाई कोभिड अस्पतालमा परिणत गर्नुपर्छ,’ कार्कीले भने, ‘आमनागरिकले गेटबाटै फर्किनु पर्ने र बाटोमै ज्यान गुमाउनु पर्ने बाध्यता छ ।’

---

प्रदेश सरकारले अहिलसम्म ६ ठूला अस्पतालमा कोरोना संक्रमितको उपचारको व्यवस्था मिलाएको छ । तर धरानस्थित बिपी कोईराला स्वास्थ्य विज्ञान प्रतिष्ठानमा १५० बेड कोरोनाका लागि छुट्याएको भन्दै सरकारले झुठो प्रचार गरेको कार्कीले अरोप लगाए । उनले भने, ‘धरानमा ३० वटा वेड मात्र सञ्चालनमा छन् ।’ 

अहिले प्रदेश सरकारको व्यवस्थापनमा रहेको मेची अस्पताल र कोभिड–१९ उपचार केन्द्र पनि संक्रमितहरुले भरिएको छ । भएका अस्पतालसमेत पूर्ण रुपमा सञ्चालनमा ल्याउन नसक्नु सरकारको लाचारी पन भएको कांग्रेसको आरोप छ । 

प्रदेश १ मा बैशाख १७ गते ३३.३० प्रतिशतमा रहेको कोरोना संक्रमण दर बैशाख २५ गतेसम्म वृद्धि भएर ४९.२३ प्रतिशतमा पुगेको छ । कोरोना महामारीका बेला सरकार निष्क्रिय भएको भन्दै प्रमुख सचेतक कार्कीले सरकार खोपीमा बसेर कुर्सी जोगाउने कार्यमा व्यस्त देखिएको बताए ।

 महामारी सरकारका लागी पैसा कमाउने मेलो भएको उनको दाबी छ । ‘कोरोनाको खोपदेखि औषधिको डोजसम्म कमिसनको खेल भएको छ’, उनले भने, ‘अघिल्लो पटक प्रधानमन्त्रीको संरक्षणमा ओम्नी समूहलगायतले गरेको अपराध यसपटक पुनः केही ठूला व्यापारीले गर्दैछन् ।’ 

संघीय सरकार अपराधी, तस्कर र बिचौलियाहरुको जालोमा रहेको कांग्रेसको आरोप छ । यस्तो अवस्थामा प्रदेश सरकार पनि संघीय सरकारको लाचार छायाँ बनेर बसेको आरोप कांग्रेसले लगाएको छ ।