कृषिप्रधान देशमा किसानलाई मारमा पार्न पाईंदैन: अनिशा नेपाली

काठमाडौं – राष्ट्रिय प्रजातन्त्र पार्टी( राप्रपा)की सांसद अनिशा नेपालीले किसानका विभिन्न आन्दोलनलाई लक्षित गर्दै कृषिप्रधान देशमा किसानलाई मारमा पार्न पाईंदैन भनेकी छिन् । 

बुधबारको प्रतिनिधिसभामा बोल्दै उनले त्यसो भनेकी हुन् । दुग्ध उद्योगको स्थापना, सुधार र प्रवर्द्धन गर्न र दुग्धपदार्थको गुणस्तर कायम गर्न अत्यन्तै जरूरी रहेको र मुलुकभरमा रहेको सरकारी सहकारी निजी क्षेत्रका दुग्ध व्यवसायको प्रवद्धन गरी दुग्धपदार्थ व्यवस्थित गर्न र गुणस्तरीय र दीगो विकासका लागि धेरै आवश्यक रहेको उनले बताइन् ।

---

उनका अनुसार ३०लाख घरपरिवार, ६०० दुग्ध उद्योग, १८०० दुग्ध सहकारी संस्थाहरू दुध उत्पादनमा प्रत्यक्ष र अप्रत्यक्ष रूपमा संलग्न रहेका छन् । 
उनले भनिन्, ‘धूलो दुध र बटरमा आत्मनिर्भर भइसकेको छ र वार्षिक तीन अर्बको छुर्पी र २० करोडको घ्यू पनि निर्यात भइरहेको छ त्यसैले राष्ट्रिय दुग्ध विकास बोर्डले किसानको हितको कार्य गरोस् ।’

सभामुखको ध्यानाकर्षण गर्दै उनले भनिन, ‘किसानहरूलाई आन्दोलन गर्न, आत्महत्या गर्न बाध्य नबनाइयोस् ।’