रुखमा भोट नहाल्नेहरू नै ठूला नेता भएको देख्छु : रावल

काठमाडौँ– नेपाली कांग्रेसका केन्द्रीय सदस्य रणबहादुर रावलले रुखलाई कहिल्यै भोट नहाल्नेहरू नै पार्टीको ठूलो नेता भएको आरोप लगाएका छन् । 

पार्टी केन्द्रीय कार्यालय सानेपामा जारी केन्द्रीय समिति बैठकमा बोल्दै रावलले यसबारे समीक्षा गर्ने बेला भएको बताएका छन् । ‘जिल्लामा भोटै नहालेका नेताहरू जिल्लाकै ठूला नेता भएको देख्छु । रुखमा भोट नहाल्ने धेरै ठूला नेताहरू देख्छु,’ उनले भने, ‘यसको समीक्षामा युवा महामन्त्रीहरूले समय खर्च गरिदिए हुन्थ्यो भन्ने मलाई लाग्छ । हामी साथ दिन तयार छौँ ।’

---

कांग्रेस कांग्रेससँगै डराउनुपर्ने स्थितिको खोजी गर्न जरुरी रहेको पनि उनले बताए । 

त्यस्तै, निर्वाचनमा राम्रो परिणाम ल्याउन नसकेपछि पार्टीको संगठन जतिसुकै ठूलो भए पनि त्यसले अर्थ नराख्ने उनको भनाइ छ । 

चुनावमा पार्टीले के कारणले राम्रो गर्न सकेन भन्ने कुराको समीक्षा गर्न पनि जरुरी रहेको उनले उल्लेख गरे ।