कांग्रेस बैठकमा पाण्डेको कटाक्ष– शेरबहादुर देउवा डुबे गगन थापा पनि डुब्नुहुन्छ

काठमाडौँ– नेपाली कांग्रेसका केन्द्रीय सदस्य सुरेन्द्रराज पाण्डेले महामन्त्री गगन थापालाई कटाक्ष गरेका छन् । कांग्रेसको केन्द्रीय कार्यालय सानेपामा जारी केन्द्रीय कार्यसमिति बैठकमा बोल्दै गण्डकी प्रदेशका मुख्यमन्त्रीसमेत रहेका पाण्डेले महामन्त्री थापाले दिएको अभिव्यक्तिले पार्टीप्रति नकारात्मक भ्रम फैल्याएको बताए । 

उनले थापालाई लक्षित गर्दै जथाभाबी नबोल्न सचेत गराए । पाण्डेले थापालाई संसदीय दलको नेता फेरेर देखाउनसमेत चुनौती दिए । पार्टीको विधानमा सभापति चुन्ने र हटाउन सक्ने व्यवस्था भएकाले बोलेरभन्दा व्यवहारमा लागू गरेर देखाउन भने । 

---

‘त्यसैले गर्ने कुरालाई सकिन्छ भने गरिहालौँ, नभए भनेर मात्रै अतिरञ्जित नगरौँ, नभए पार्टीको बारेमा नै नकरात्मक भ्रम फैलाउने काम पार्टीका नेताहरूबाट नहोस्,’ उनले भने, ‘जे जे भए पनि हामी सबै एकै डुंगामा छौँ, डुब्दा सबै एकैपटक डुब्छौँ । शेरबहादुर देउवा डुबे गगन थापा पनि डुब्नुहुन्छ, म पनि डुब्छु ।’

कांग्रेसको केन्द्रीय कार्यसमिति बैठक जारी छ । करिब एक वर्षपछि बसेको बैठकको आज तेस्रो दिन हो । आज पनि विभिन्न केन्द्रीय सदस्यहरूले आफ्नो धारणा राखिरहेका छन् ।