कृषिको कार्यक्षेत्र धेरै रहेकाले समन्वयकारी भूमिका निभाउनेछु : आरजु राणा

काठमाडौँ- प्रतिनिधि सभा अन्तर्गतको कृषि सहकारी तथा प्राकृतिक स्रोत समितिको सभापतिमा आरजु राणा देउवा निर्वाचित भएकी छिन् ।

सोमबार भएको समितिको बैठकमा समितिका ज्येष्ठ सदस्य नवलकिशाेर साह सुडीले देउवा सर्वसम्मत रूपमा निर्वाचित भएको घोषणा गरेका हुन् । निर्वाचित भएपछि देउवाले सबैसँग समन्वय गरेर समितिको बैठकलाई प्रभावकारी तवरले सञ्चालन गर्ने बताइन् । उनले संविधान अनुरूप र जनताको आशा अनुरूप सरकारलाई सुझाव दिने बताइन् । उनले कृषि वृहत् क्षेत्र रहेको भन्दै आफूले सदैव समन्वयकारी भूमिका निर्वाह गरेर अघि बढ्ने बताइन् ।

---

राणाले सम्बद्ध मन्त्रालयलाई आवश्यक अनुसार निर्देशन दिइने र सरकारको काम गर्ने शैलीमा सुधार ल्याउन समितिले अग्रणी भूमिका खेल्ने बताइन् ।