खुसी साट्न एकाबिहानै तातोपानी पुगे माओवादी सांसद सापकोटा {तस्बिरहरू}

काठमाडौँ- नेपाल चीन तातोपानी नाकाबाट आठ वर्ष पछि मानव आवतजावत सुरु भएको छ । शुक्रबार लिपिङस्थित मितेरी पुलबाट नेपाली अध्यागमन कार्यालयको पास लिएका सिन्धुपाल्चोकका बासिन्दा चिनियाँ सुरक्षाकर्मीलाई चेकजाँच गराएर चीनतर्फ प्रस्थान गरे । सांसद सापकोटा आफैंले मितेरी पुल तरेर चीन प्रस्थान गरे । नेकपा माओवादी केन्द्रबाट निर्वाचित सांसद माधव सापकोटा सुबोधसहितको टोलिलाई चिनियाँहरूले भव्य स्वागत गरेका थिए ।

 

---

यो ऐतिहासिक क्षणको साक्षी बनेर खुसी साट्न नाका खुलाउने नेतृत्वदायी भूमिका खेलेका सिन्धुपाल्चोक क्षेत्र नं १ बाट प्रत्यक्ष निर्वाचित प्रतिनिधि सभा सदस्य  सापकोटा एकाबिहानै तातोपानी नाका पुगेका थिए । तातोपानी क्षेत्रका जनप्रतिनिधि, भन्सार र अध्यागमन कार्यालयका अधिकारीहरू सहित नाका पुगेका उनले अब नाका पूर्ण सञ्चालनको बाटोमा गएको प्रतिक्रिया दिएका छन् ।

२०७२ साल वैशाख १२ गतेको महाभुकम्पपछि नेपाल चीनबीचको सो नाका पूर्ण रुपमा बन्द रहेको थियो । नेपाल र चीन दुबैतर्फ ठूलो मानवीय र भौतिक क्षति भएका कारण लामो समयसम्म नाका बन्द अवस्थामा थियो । भूकम्प सृजित कठिनाई पन्छाएर सिमित सुचारु भएको नाका २०७६ साल फागुनमा विश्वव्यापी रुपमा कोरोना महामारी फैलिएपछि नाका पुनः बन्द रहेको थियो ।

‘नाका खुलेकोमा म खुसीयाली साटासाट गर्न चाहन्छु । बाटोमा जटिलता छ । बाटो स्तरोन्नति गर्न चीन सरकारले सहयोग गर्ने संकेत छ’ सिन्धुपाल्चोक क्षेत्र नं. १ का सांसद सापकोटाले भने, ‘मानव आवतजावत हुँदा खाने बस्ने व्यवस्था गर्न लाग्नेछौँ । नाका चलेमा रोजगारी सृजना हुने हुँदा अर्थतन्त्रले गति पनि लिनेछ ।’

चीनबाट सिमित सामान आयातका लागि खुल्ला रहेको नाकाबाट २०८० बैशाख १८ (१ मे) बाट दोहोरो आयात निर्यात खुलाइएको थियो ।

आयात निर्यात खुले लगत्तै मानव आउजाउका लागि संसदमा संवोधन, कुटनीतिक भेटघाट र प्रधानमन्त्री, गृहमन्त्री र परराष्ट्र मन्त्रीलाई भेटगरी सोही विषयमा ज्ञापन पत्र बुझाउने कामको नेृतृत्व लिएका सांसद सापकोटा लगत्तै सिन्धुपाल्चोकका जनप्रतिनिधि, सुरक्षा निकाय र सम्वद्ध पक्षसँग सर्वपक्षीय छलफल चलाएका थिए ।

परिणाम स्वरुप चिनियाँ अधिकारीहरूले आजैदेखि मानव ओहोर दोहोरका लागि नाका सुचारु गर्न तयार रहेको खबर पठाएका थिए । त्यसपछि चिनियाँ अधिकारीबीच भएको छलफलले स्थानीय सर्वसाधारण आवतजावत गर्न पाउने निर्णय गरेको प्रमुख जिल्ला अधिकारी रमेश न्यौपानेले जानकारी दिए ।