बालेनलाई लक्षित गर्दै खतिवडाले भने– बोल्दा जिब्रोमा ब्रेक लगाऊँ

काठमाडौँ– नेपाली कांग्रेसका सांसद रामहरि खतिवडाले नेता र जनप्रतिनिधिलाई बोल्दा विचार गर्न आग्रह गरेका छन् । सोमबारको प्रतिनिधिसभा बैठकमा शून्य समयमा बोल्दै खतिवडाले काठमाडौं महानगरपालिकाका मेयर बालेन्द्र शाह (बालेन)प्रति लक्षित गर्दै बोल्दा जिब्रोमा ब्रेक लगाउन आग्रह गरे ।

उनले भने, ‘सम्माननीय सभामुखज्यू, राजनीतिज्ञ निर्वाचित भएपछि जे पायो त्यही बोल्न गइराखेका हुन्छौँ । कोही आगै उकेल्छु, सिंहदरबार नै ध्वस्त पार्छु भन्छौँ । कोही जातीय राज्य चाहियो भन्छौँ । कोही धार्मिक स्वतन्त्रता, धर्ममाथि आँच आउने काम गर्छौँ । जित्ने राजनीतिज्ञ र निर्वाचित प्रतिनिधिलाई जिब्रोमा ब्रेक लागेर अनुरोध गर्दछु ।’

---

शनिबार रात आफ्नी पत्नी सवार सरकारी गाडीलाई ट्राफिक प्रहरीले नियमित चेकिङका क्रममा रोकेपछि बालेनले सिंहदरबार जलाउने भन्दै सामाजिक सञ्जाल फेसबुकमा स्ट्याटस लेखेका थिए । उनको उत्तेजक अभिव्यक्तिलाई लिएर व्यापक विरोध भएपछि सोमबार हटाएका छन् ।