नेकपा एसका अध्यक्ष माधव नेपाल हेटौंडा आउने

मकवानपुर- नेकपा (एकीकृत समाजवादी) अध्यक्ष माधवकुमार नेपाल शुक्रबार हेटौंडा आउने भएका छन् । पार्टीकाे मेची–महाकाली समाजवादी जागरण अभियान २०८० अन्तरगत शुक्रबार हेटौंडामा हुने कार्यक्रमलाई सम्बोधन गर्न अध्यक्ष नेपाल यहाँ आउन लागेका हुन् ।

नेकपा एस मकवानपुर जिल्ला कमिटीले बिहीबार हेटौंडामा पत्रकार भेटघाट गर्दै उक्त कुरा जानकारी गराइएको हो । पार्टी जिल्ला अध्यक्ष विष्णुप्रसाद दाहालले असोज १४ गतेबाट सुरु हुने १५ दिने मेची–महाकाली अभियानको टोली भोलि हेटौंडामा आइपुग्ने बताए । हेटौंडामा हुने अभियानकाे कार्यक्रमलाई पार्टी अध्यक्ष नेपालले सम्बोधन गर्ने उनले जानकारी दिए ।

---

कार्यक्रमलाई अध्यक्ष नेपालसँगै पार्टीका नेता झलनाथ खनाल, महासचिव घनश्याम भुसाल लगायतका शीर्ष नेताहरूले सम्बोधन गर्ने अध्यक्ष दाहालले बताए ।

दाहालका अनुसार, शुक्रबार बिहान साढे १० बजे हेटौंडाको सिमाचोकमा जनसभाको आयोजना गरिएको छ । पत्रकार भेटघाटमा पार्टी  सचिव एवम् बागमती प्रदेश इन्चार्ज गंगा तुलाधर, सहइन्चार्ज ललितबहादुर बस्नेत, बागमती अध्यक्ष सावित्री भुषाल, स्थायी कमिटी सदस्य विराेध खतिवडा, बागमती प्रदेश सरकार उद्याेग मन्त्री लक्ष्मण लम्साललगायतकाे उपस्थिति रहेकाे थियाे ।