‘छिमेकी देशको प्रधानमन्त्री नेपालमा आउँदा परराष्ट्र मन्त्रालयले सरकारलाई जानकारी गराउनु पर्दैन ?’

काठमाडौँ– राष्ट्रिय स्वतन्त्र पार्टीका सभापति रवि लामिछानेले भारतीय प्रधानमन्त्री नरेन्द्र मोदी बिना जानकारी नेपाल भ्रमणमा आएको विषयमा परराष्ट्र मन्त्रालयसँग जवाफ मागेका छन् । बिहीबारको प्रतिनिधिसभा बैठकमा आकस्मिक समयमा बोल्दै लामिछानेले मोदी आज बिहान कालापानीको गुञ्जीमा आएको विषयमा प्रश्न सोधेका हुन् । 

‘मित्र राष्ट्रको प्रधानमन्त्री हाम्रो भूमिमा आउँदा न सरकारले स्वागत गरेको छ न देशलाई यसबारे कुनै जानकारी छ । यत्रो ठूलो भ्रमण गरिएको क्षेत्र हाम्रै देशमा पर्छ । हामीले पास गरेको चुच्चे नक्साभित्र पर्छ,’ उनले भने । 

---

लामिछानेले यस विषयमा आधिकारिक कुरा बुझ्न आफूले दार्चुलाका प्रमुख जिल्ला अधिकारीसँग फोन सम्पर्क गरेको बताए । अधिकारीले यस विषयमा आफूलाई कुनै जानकारी नभएको र त्यहाँ जान नमिल्ने जवाफ दिएको लामिछानेले सुनाए । 

‘म सरकार र परराष्ट्र मन्त्रालयलाई सोध्न चाहन्छु– छिमेकी देशको प्रधानमन्त्री हाम्रो भूमिमा आउँदा परराष्ट्र मन्त्रालयले सरकार र नेपाल जनतालाई जानकारी गराउनु पर्दैन ?,’ उनले सोधे । 

भारतीय प्रधानमन्त्री मोदी बिहीबार बिहान हेलिकप्टर चढेर नेपालको कालापानी क्षेत्रमा आएका हुन् ।