जनकपुरधाम : जनता समाजवादी पार्टी उपेन्द्र यादव समूहले प्रदेश २ मा संसदीय दलको नेता चयन ‘अवैधानिक’ भएको जिकिरसहित महन्थ ठाकुर समूहले ‘हास्यास्पद निर्णय’को संज्ञा दिएको छ । पार्टी अध्यक्ष यादवको उपस्थितिमा जनकपुरधाममा बसेको आन्तरिक बैठकबाट संसदीय दलको नेतामा मुख्यमन्त्री लालबाबु राउतलाई चयन गरेको थियो ।

जसपा नेता चयनबारे तत्कालीन राजपाका संसदीय दलका नेता एवं जसपाका कार्यकारिणी सदस्य जितेन्द्र सोनलले आश्चर्य व्यक्त गर्दै आफूहरु त्यसबारे अनभिज्ञ रहेको बताए । ‘त्यसरी नेता चयन गरिएको संचार माध्यमबाट थाहा पायौंं’ सोनलले इकागजसँग कुरा भने, ‘विधान नै नरहेको अवस्था दलको नेता चयन गर्नु गलत हो ।’

---

उनले जसपाको विधान नै पारित नभएको अवस्था दलको चयन गर्नु आफैँमा हस्यापद रहेको छ । दलको नेता चयन गर्ने अधिकार पार्टीको विधानअनुरुप प्रदेश समितिमा निहित भएको जानकारी दिए ।

प्रदेश सरकारका भौतिक पूर्वाधार विकास मन्त्रीसमेत सोनलले भने प्रदेश समितिद्वारा निर्वाचन प्रणालीमार्फत् दलको नेता चयन गर्नुपर्ने प्रावधान भएको बताए । उनले भने, ‘तर ती प्रक्रिया मिची कुनै एक अध्यक्षले आफू अनुकूल मनपरी ढंगले विधान पारित र दलको नेता चयन गर्नु अवैधानिक हो । हामी त्यसलाई मान्दैनौं ।’

त्यस्तै, प्रदेश सभा सदस्य एवं पूर्व राजपाका प्रमुख सचेतक परमेश्वर साहले दलको नेता चयनबारे आश्चर्य व्यक्त गर्दै भने, ‘यसबारे आफूहरुलाई कुनै औपचारिक छैन । बैठक कहाँ बस्यो ? कसले गठन गर्‍यो ? कुन प्रक्रियाबाट गरियो केही जानकारी भएन । चोर-बाटोबाट दलको नेता चयन गरेको भए बेग्लै कुरा हो । त्यसरी गरिएको हो भने अवैधानिक र गैरकानूनी काम हो ।’ 

अध्यक्ष यादवको उपस्थितिमा बैठक गरी तत्कालीन समाजवादी पार्टीका प्रदेश सभा सदस्यहरुको हस्ताक्षरमा मुख्यमन्त्री लालबाबु राउतलाई  दलको नेतामा चयन गरेका हुन् । त्यसमा तत्कालीन सपाका ३० र राजपाका ८ जना गरी ३८ जनाको हस्ताक्षर छ ।

हाल प्रदेश-२ समाजवादी फोरमका ३०, राजपाका २५, एमालेका २१, कांग्रेसका १९ र माओवादी केन्द्रका ८ तथा एक स्वतन्त्र गरी कुल १०४ जना सांसद छन् । सरकार गठन गर्न ५३ जना प्रदेश सभा सदस्य चाहिन्छ । सपा, कांग्रेस र माओवादी मिल्दा ५७ सदस्य पुग्छ ।

यसअघि प्रदेशसभाको सदस्य संख्या १०७ रहेपनि माओवादी केन्द्रले एमालेमा गएका  चार सांसदलाई कारबाही गरेको थियो । यो हिसाबले प्रदेश–२ मा सरकार गठन गर्न ५३ जना सांसद भए पुग्छ ।