सरकारको नीति तथा कार्यक्रम निकै राम्रा आएको छ : अर्थमन्त्री पुन

काठमाडौँ- अर्थमन्त्री वर्षमान पुनले सरकारको नीति तथा कार्यक्रम निकै राम्रा आएको र यसका आधारमा आगामी आर्थिक वर्षको बजेट आउने बताएका छन् । 

मंगलबार संसद् भवन नयाँ बानेश्वरमा सञ्चारकर्मीसँग कुरा गर्दै अर्थमन्त्री पुनले अहिलेको कार्यक्रम राम्रो भएकाले यसलाई समर्थन गर्ने गरी बजेट आउने बताएका हुन् । उनले बजेट मार्फत सरकारको नीति कार्यक्रम कार्यान्वयन गर्न सरकार प्रतिबद्ध रहेको धारणा राखे ।

---

यस पटक नीति तथा कार्यक्रम र बजेटका तालमेल नभएको भन्ने गुनासो नआउने उनले दाबी गरे । त्यस्तै उनले राष्ट्रपतिले नीति तथा कार्यक्रम पेस गरेपछि धन्यवाद दिने बैठक कांग्रेसले अवरुद्ध गर्नु उचित नभएको बताए ।

अर्थमन्त्री पुनले जनप्रतिनिधि संस्थालाई लगातार अवरुद्ध गर्न नहुने भन्दै एकपक्षीय आरोपको जवाफ सदनमा  दिन पाउनुपर्ने बताए ।