न्युरोडमा फुटपाथ बढाउने महानगरको कदम कानुनसम्मत छैन : मन्त्री महासेठ

काठमाडौँ - उपप्रधान एवं भौतिक, पूर्वाधार तथा यातायात मन्त्री रघुवीर महासेठले न्युरोडमा फुटपाथ बढाउने काठमाडौं महानगरको कदम कानुनसम्मत नभएको बताएका छन् । 

आइतबार संसद भवन सञ्चारकर्मीसँग कुरा गर्दै महासेठले सडक विभागमा धुलो खन्याउने कदमप्रति कुनै गुनासो नभएपनि न्युरोडमा फुटपाथ बढाउने नाममा सार्वजनिक बाटोको चौडाइ घटाउने काम कानुनसम्मत नभएको बताएका हुन् । 

---

कानुनसम्मत नभएकै कारण सडक विभागले त्यसलाई रोकेको उनले बताए । महानगर प्रमुख बालेन शाहले कलंकी–महाराजगन्ज सडकको विषयमा उठाएका विषय सकारात्मक भएको भन्दै उनले त्यसप्रति कुनै आपत्ति नभएको धारणा राखे । 

महानगरको कदमप्रति सरसल्लाह भइरहेको उनको भनाइ छ ।

कलंकी–महाराजगन्ज सडक निर्माणका लागि आन्तरिक स्रोतबाट पनि बजेट व्यवस्थापन गरिएको उनले जानकारी दिए । कलंकी–महाराजगञ्ज सडक विस्तार सुस्त भएको र त्यसका कारण जनतालाई समस्या भएको भन्दै महानगरले विरोध स्वरूप शनिबार मिनभवनस्थित सडक विभागमा एक ट्रक धुलो खन्याएको थियो ।