वनलाई जनताको समृद्धिसँग जोड्ने गरी काम गर्नेछौं : नवनियुक्त मन्त्री शाही
![](https://ekagajcdn.prixacdn.net/media/albums/ainb_7ZkvJBdt4N.jpg)
काठमाडौँ- नवनियुक्त वन तथा वातावरणमन्त्री ऐनबहादुर शाही ठकुरीले वन क्षेत्रलाई जनताको जीविकोपार्जन र मुलुकको समृद्धिसँग जोड्ने गरी काम गर्ने बताएका छन् । आज सिंहदरबारस्थित मन्त्रालयमा पद बहाली गर्दै उनले वन तथा वनस्पतिको संरक्षणसँगै यसलाई जनताको जीविकोपार्जनसँग पनि जोड्न आवश्यक रहेकामा जोड दिए ।
मन्त्री शाहीले मन्त्रालयसँग सम्बन्धित कामलाई परिणाममुखी बनाउने गरी काम गर्न कर्मचारीलाई निर्देशन दिए ।
उनले जलवायु परिवर्तनले नेपालमा पारेको असरलाई अन्तर्राष्ट्रियकरण गर्न सक्दो प्रयास गर्ने बताए । जैविक विविधतालाई संरक्षण गर्दै पर्या–पर्यटनको विकासमा योगदान पुग्ने गरी काम गर्ने उनको प्रतिबद्धता थियो । मन्त्री शाहीले नियमकानुनले मिल्नेबाहेकका काममा आफूले कुनै दबाब नदिने तर कानुनअनुसार कर्मचारीले कुनै आनाकानी नगरी परिणाममुखी काम गर्नुपर्ने उल्लेख गरे । उनले वनलाई राष्ट्रिय अर्थतन्त्रको प्रमुख आधार बनाउने गरी योजना बनाइने बताए ।
कार्यक्रममा मन्त्रालयका सचिव डा गोविन्दप्रसाद शर्माले मन्त्री शाहीलाई स्वागत गर्दै आफ्ना धारणा राखेका थिए भने मन्त्रालयका प्रवक्ता एवं सहसचिव बद्रीराज ढुङ्गानाले मन्त्रालय र मन्त्रालय मातहतका निकायबारे जानकारी गराएका थिए ।
कमेन्ट गर्नुहोस्
Sign in with
Facebook Googleकमेन्ट पढ्नुहोस्
0 प्रतिकृया