बर्दियाको क्रियाशील विवाद मिलाउन देउवाले पठाए केन्द्रीय प्रतिनिधि

काठमाडौँ : नेपाली कांग्रेसले बर्दिया जिल्लामा रहेको क्रियाशील सदस्यता विवाद मिलाउन केन्द्रीय प्रतिनिधि पठाएको छ । सभापति शेरबहादुर देउवाले केन्द्रीय सदस्यद्वय सुरेन्द्रराज पाण्डे र दीपक गिरीलाई बर्दियाको विवाद मिलाउन पठाएका उनको सचिवालयले जानकारी दियो । 

पठाइएका दुई नेता एक जना संस्थापनका र अर्का वरिष्ठ नेता रामचन्द्र पौडेल समूहका हुन् । पाण्डे संस्थापन र गिरी पौडेल समूहका हुन् । 

---

क्रियाशील सदस्यतामा विवाद हुँदा जिल्ला पार्टी कार्यालयमा गत बैशाखदेखि तालाबन्दी छ । क्रियाशील सदस्यतामा बर्दियाको प्रतिनिधि सभा क्षेत्र नम्बर–१ र प्रतिनिधि सभा क्षेत्र नम्बर-२ का राजापुर नगरपालिका-४ र मधुवन नगरपालिका-३ मा चर्को विवाद छ । 

विवाद चर्को भएपछि जिल्ला उपसभापति मिश्रीलाल यादव र सचिव जीवन मल्लसहित जिल्ला कार्यसमिति सदस्य र महासमिति तथा महाधिवेशन प्रतिनिधि गरी ५२ जनाले वैशाख ९ गते राजीनामा दिएका थिए ।

उनीहरूलाई राजीनामा दिन उक्साएका जिल्ला सभापति सञ्‍जय गौतमले भने अन्तिममा आफूले राजीनामा नदिएको भन्दै जिल्लाका धेरै नेता कार्यकर्ता असन्तुष्ट छन् । 

विवाद मिलाउन जिल्लामा पुगेको प्रतिनिधि मण्डलले अहिले दुवै पक्षसँग छलफल गरिरहेको छ ।