कांग्रेसको निर्वाचन समिति महाधिवेशनका कार्यक्रममा सक्रिय

काठमाडौँ – सत्तारुढ नेपाली कांग्रेसको निर्वाचन समिति महाधिवेशनलक्षित कार्यक्रमको तयारीमा जुटेको छ । क्रियाशील सदस्यता विवाद समाधानका लागि शीर्ष नेतृत्वबीच छलफल चलिरहेका बेला निर्वाचन समिति महाधिवेशनलक्षित कार्यक्रमको तयारीमा जुटेको हो । 

निर्वाचन समितिले निर्वाचन निर्देशिका, नियमावली, विधान र प्रमाणपत्र प्रकाशित गर्न सुरु गरिसकेको छ । करिब आठ हजारप्रति निर्देशिका, नियमावली र विधान प्रकाशित भएको छ भने तल्लो तहका निर्वाचित पदाधिकारी र सदस्यका लागि तीन लाख बढी प्रमाणपत्र प्रकाशनको काम जारी रहेको समितिले जनाएको छ ।

---

३० साउनको केन्द्रीय समिति बैठकले क्रियाशील सदस्यताको बाँकी काम २ भदौसम्म टुंग्याउने र ३ भदौमा सभापतिलाई बुझाउने निर्णय गरे पनि विवाद समस्या हालसम्म समाधान भएको छैन् । यस्तै १ भदौसम्म निर्वाचन निर्देशिकामा आवश्यक परिमार्जन गर्ने, १० भदौसम्म ७७ वटै जिल्लामा निर्वाचन अधिकृतसहित आवश्यक कागजात पठाइसक्ने सहमति गरेको कांग्रेसले क्रियाशील सदस्यता र निर्वाचन निर्देशिकामा सहमति जुटाउन ढिलाइ गरेको हो ।

समितिकाअनुसार अब १४ भदौसम्म प्रत्येक जिल्लामा निर्वाचन अधिकृत पठाइसक्ने तयारी रहेको छ । ‘समयमै जिल्लामा कागजात पुर्‍याउने र त्यहाँबाट वडातहमा वितरण गर्ने भन्नेमा हामी छलफल गरिरहेका छौं,’ समितिका एक सदस्यले भने, ‘भौगोलिक विकटता भएका क्षेत्रमा समयमै मतदान अधिकृत पठाउन र आवश्यक कागजात पुर्‍याउनुपर्ने चुनौती छ ।’

९–१३ मंसिरसम्म १४ औं महाधिवेशन गर्ने गरी कार्यतालिका सार्वजनिक गरेको कांग्रेसले आइतबार साँझसम्म क्रियाशील सदस्यताको टुंगो लगाएको छैन ।