महन्थ ठाकुर केपी ओलीको मतियार हुन् : उपेन्द्र यादव

बुटवल – जनता समाजवादी पार्टी, नेपाल (जसपा)का अध्यक्ष उपेन्द्र यादवले महन्थ ठाकुरले जनभावनाअनुसार काम गर्न नसकेको आरोप लगाएका छन् । आइतबार भैरहवामा जसपाले आयोजना गरेको अभिमुखीकरण कार्यक्रमलाई सम्बोधन गर्दै अध्यक्ष यादवले दुई–दुई पटकसम्म प्रतिनिधि सभा विघटन गरेका केपी शर्मा ओलीको साथमा लागेर ठाकुर ओलीको मतियार बनेको दाबी गरे । दुई पटकसम्म प्रतिनिधि सभा विघटन गरेर ओलीले एकै व्यक्तिलाई दुई पटक मृत्युदण्डको सजाय दिएको यादवको आरोप छ ।

‘आफूलाई मधेशको नेता भन्ने ठाकुर एण्ड कम्पनी संसद् विघटन गर्ने केपी ओलीको मतियार बनेको छ । तर प्रतिगमनकारी सपना जसपाले चकनाचुर पारेको छ,’ पूर्वउपप्रधानमन्त्रीसमेत रहेका अध्यक्ष यादवले भने, ‘संसद् विघटन गर्ने ओलीको कदमविरुद्ध जसपा सडक आन्दोलनमा उत्रिएको थियो । सुरुमा हामी आन्दोलनमा उत्रिए पनि कांग्रेसका केही नेता चुनावमा जान पाए ठीक हुन्थ्यो भन्ने सोचमा थिए ।’ 

---

यादवले संघीय लोकतान्त्रिक गणतन्त्र बचाउने काममा जसपा अग्रणी रहेको दाबी गरे । लोकतन्त्र, गणतन्त्र, संघीयता, धर्मनिरपेक्षतालगायत महत्वपूर्ण उपलब्धीको संस्थागत गर्नुपर्ने आवश्यकता रहेको उनको भनाइ छ । प्राप्त उपलब्धी रक्षा गर्दै बाँकी रहेका अधिकारका लागि लड्नुपर्ने उनले बताए । ००७ सालमा प्राप्त उपलब्धी संस्थागत गर्न नसकेकै कारण लामो संघर्ष गर्नुपरेकाले अहिले प्राप्त उपलब्धी संस्थागत गर्न नेता तथा कार्यकर्तालाई उनले आग्रह गरे ।

 ‘त्रुटिपूर्ण र विभेदकारी संविधान संशोधन गर्नुपर्छ, सात प्रदेशको संरचना बदल्नुपर्छ । अहिलेको निर्वाचन प्रणाली खर्चिलो भएकाले किसान, मजदूरले निर्वाचन लड्न सक्ने अवस्था छैन । त्यसैले समानुपातिक निर्वाचन प्रणाली आवश्यक छ,’ उनले भने, ‘सबै भाषाको सम्मान गर्दै विभेद र असमानताको अन्त्य गर्नुपर्छ । मधेसी नागरिकलाई विदेशी सरहको नागरिकको रूपमा हेर्ने दृष्टिकोणमा परिवर्तन आउनुपर्छ । राज्यले विपन्न वर्गको शिक्षा, स्वास्थ्य र रोजगारीको ग्यारेन्टी गर्नुपर्छ ।’ 

कार्यक्रममा जसपा वरिष्ठ नेता अशोक राईले पहिचानको संघीयता र प्रदेशलाई स्वायत्त बनाउनुपर्ने जसपाको माग रहेको बताए । उनले न्यायपूर्ण समाजको परिकल्पनाको साथ जसपाको निर्माण भएको बताए । ‘हामी अग्रगामी यात्रा तय गर्न गठबन्धन गरेर अगाडि बढेका छौं,’ राईले भने ।

पार्टीका केन्द्रीय कार्यकारिणी सदस्य तथा पूर्वमन्त्री महेन्द्र राय यादव, नवराज सुवेदी, नर्सिङ चौधरी, अमृता अग्रहरी, सहसराम यादव, अशोककुमार यादवलगायत नेताहरूले महन्थ ठाकुरहरूले प्रतिगमनलाई साथ दिएको तर्क गरे ।