भवन तोडफोड गर्नेलाई कारबाही नभएकाेमा ओलीको आपत्ति

काठमाडौँ – नेकपा एमाले अध्यक्ष केपी शर्मा ओलीले निजामती कर्मचारी संगठनको कार्यालयमा तोडफोड गर्नेलाई सरकारले कारबाही नगरेको भन्दै आपत्ति जनाएका छन् । एमालेको काठमाडौं उपत्यका विशेष प्रदेश कमिटीले बिहीबार आयोजना गरेको कार्यकर्ता भेलालाई सम्बोधन गर्दै ओलीले सरकारप्रति आलोचना गरे ।

निजामती कर्मचारी संगठनको बबरमहलस्थित कार्यालयमा माधव नेपाल पक्षीय कर्मचारीले आक्रमण गरेको र सुरक्षाकर्मीले संगठनका नेता कार्यकर्तालाई नियन्त्रणमा लिएको भन्दै ओलीले विरोध जनाए । कार्यक्रममा एमालेका महासचिव ईश्वर पोखरेलले नेता नेपालले नयाँ पार्टी खोलेर कम्युनिष्ट आन्दोलनलाई धोका दिएको बताए । पार्टी स्थायी कमिटीका सदस्य रामबहादुर थापाले विशेष क्षेत्रका कार्यकर्ताले विशेष ढंगले काम गरेर देखाउनुपर्ने धारणा राखे । 

---

कार्यक्रमा कमिटी अध्यक्ष सुजिता शाक्यले पनि आफ्नो भनाइ राखेकी थिइन् । एमालेबाट माधव नेपालपक्ष विभाजित भएपछि कार्यालय भवन आफ्नो पक्षको रहेको दाबी गर्ने क्रममा सोमबार दुई पक्षका कर्मचारीरूबीच झडप भएको थियो ।