जनकपुरधाम - प्रदेश २ मा मुख्यमन्त्री लालबाबु राउतलाई कारबाहीकाे माग गर्दै डा. सिके राउत नेतृत्वको जनमत पार्टीका नेता कार्यकर्ताले महोत्तरीको बर्दिबासस्थित अख्तियार दुरुपयोग अनुसन्धान आयोगको कार्यालय घेराउ गरेका छन् ।

बुधबार जनमत पार्टीका नेता कार्यकर्ताहरूले साइकल खरिदमा भएकाे अनियमितताकाे निष्पक्ष रूपमा छानबिन र मुख्यमन्त्री राउतकाे कारबाहीकाे माग गर्दै अख्तियारकाे कार्यालय घेराउ गरेका हुन् ।

---

जनमतका नेता कार्यकर्ताहरूले जनकपुरधामबाटै माेटरसाइकल जुलुस प्रदर्शन र चर्काे नाराबाजी गर्दै अख्तियारकाे कार्यालय पुगेका थिए । पछिल्लाे साता 'बेटी बचाऊ, बेटी पढाउ’ अभियान अन्तर्गत कक्षा ८ का छात्रालाई वितरणका लागि खरिद गरिएका साइकलमा अनियमितता भएकाे आशंकामा अख्तियारले छापा मारेकाे थियाे । छापा मारेपछि अनुसन्धानका लागि अख्तियारको टोलीले विभिन्न फाइलहरू नियन्त्रणमा लिएको थियो ।

त्यसयता मुख्यमन्त्री राउतकाे बचाउमा सतारूढ दल जनता समाजवादी पार्टी र कारबाहीकाे माग गर्दै जनमत पार्टीले प्रदर्शन गर्दै आएका छन् ।