न्यायाधीशहरूले संविधान उल्लंघन गरेको एमालेको तर्क

काठमाडौँ – नेकपा एमालेले न्यायालयमा अहिले भइरहेको गतिविधिलाई दुर्भाग्यपूर्ण भनेको छ । ललितपुर च्यासलस्थित तुलसीलाल स्मृति प्रतिष्ठानमा बिहीबार बसेको स्थायी कमिटी बैठकमा नेताहरूले यस्तो धारणा राखेको बैठकपछि प्रवक्ता प्रदीप ज्ञवालीले जानकारी दिए ।

‘न्यायालयमा जुन किसिमको प्रदुषण र गुटबन्धी व्याप्त छ यसबाट हामी दुःखी छौं । यसबाट जनताको न्याय पाउने अधिकार हनन् भएको छ,’ प्रवक्ता ज्ञवालीले भने ।संकटकालमासमेत नरोकिने बन्दीप्रत्यक्षीकरण मुद्दा नहेरेर न्यायाधीशहरूले संविधानको उल्लंघन गरेको र नागरिकको संविधानप्रदत्त मौलिक हकको हनन गरेको एमालेको आरोप छ । ‘उहाँहरूको यो गतिविधि अत्यन्तै अशोभनीय र दुःखद छ,’ उनले भने ।

---

अहिलेको विवाद न्यायलयभित्रको सुधारसँग नजोडिएको पनि एमालेले टिप्पणी गरेको छ । ‘न्यायालयको अहिलेको समस्या भनेको केही निश्चित पार्टी र व्यक्तिको स्वार्थका लागि न्यायालयका केही व्यक्तिले गरेको अपवित्र साँठगाठ हो । न्यायलय र राजनीतिको अपवित्र गठबन्धन आजको समस्या मुल चुरो हो,’ प्रवक्ता ज्ञवालीले भने ।