माओवादी र जसपाबीच एकता गर्न दाहालको प्रस्ताव

मलंगवा – नेकपा माओवादी केन्द्रका अध्यक्ष पुष्पकमल दाहालले जनता समाजवादी पार्टी, नेपाल (जसपा)बीच पार्टी एकताको प्रस्ताव गरेका छन् । शनिबार सर्लाहीको सदमुकाम मलंगवामा आयोजित शिक्षक संगठनको कार्यक्रमलाई सम्बोधन गर्दै दाहालले यस्तो प्रस्ताव गरेका हुन् ।

जसपानिकट रामेश्वरप्रसाद यादव नेतृत्वको नेपाल लोकतान्त्रिक शिक्षक फेडरेसन माओवादीमा समाहित भएको कार्यक्रममा बोल्दै दाहालले शिक्षक फेडेरेसनमात्र होइन सिंगो जसपा नै माओवादी मिसाउन आह्वान गरेका हुन्  । ‘घ्यू कहाँ पोखियो थालमा । अब ढिलो नगरी पार्टी एकता गरौं । क्षेत्रीय पार्टीबाट मधेसी जनताको नि हित हुँदैन, पाहाडी जनताको पनि विकास हुँदैन । जसपासँग गठबन्धन त गरेका छौं । अब पार्टी नै एक बनाऔं । मधेसी जनतालाई चाहिले सम्मान र अधिकार दिन कन्जुस्याइँ गर्ने छैनौं,’ दाहालले भने, ‘पार्टी एकता घोषणा सभा जनकपुरमै गरौं ।’ 

---

माओवादी र जसपा मिल्दा मधेसमा बहुमत आउने दाहालको दाबी छ । प्रधानमन्त्री शेरबहादुर देउवा विदेशबाट फर्किएपछि नागरिकतासम्बन्धी कामलाई सरकारको पहिलो प्राथमिकतामा राखिने दाहालले बताए । ‘सबै प्राविधिक कुरा भन्दिनँ । हेर्नुहोला, प्रधानमन्त्री विदेशबाट फर्किएपछि नागरिकता ऐनसम्बन्धी कामलाई पहिलो प्राथमिकतामा राखेर गरिनेछ,’ उनले भने ।