झलनाथ खनाल पार्टी काममा सक्रिय

काठमाडौँ – नेकपा एकीकृत समाजवादीका सम्मानित नेता झलनाथ खनाल पार्टी काममा सक्रिय भएका छन् । विदेश विभागका प्रमुखसमेत रहेका खनाल सोमबार मीन भवनस्थित पार्टी कार्यालयमा विभागको तीन घण्टासम्म चलेको पहिलो बैठकमा पूरा समय सहभागी भएको पार्टीका उपमहासचिव एवम् प्रचार विभाग प्रमुख जगन्नाथ खतिवडाले बताए ।

सो बैठकले डा. शंकर खतिवडालाई विदेश विभाग सचिवमा चयन गरेको छ । नेता खनालले विभागका सदस्यहरूसँग आगामी कार्ययोजनाबारे छलफल गरेका छन् ।मिर्गौला प्रत्यारोपणका लागि असार २ गते भारतको नयाँ दिल्लीको एपोलो हस्पिटल पुगेका खनाल १४ भदौमा काठमाडौं फर्किएपछि घरमै आराम गरी बसेका थिए । 

---

पार्टी दर्ता भएपछि खनाल पार्टीको एउटा सचिवालय बैठकमा उपस्थित भएका थिए भने पार्टी कार्यालय स्थापना भएपछि उनी पहिलोपटक सोमबार विभागको बैठकमा सहभागी भएका हुन् ।