संविधान संशोधन अपरिहार्य : उपेन्द्र यादव

रुपन्देही – जनता समाजवादी पार्टी, नेपाल (जसपा)का अध्यक्ष उपेन्द्र यादवले संविधान संशोधन अपरिहार्य रहेको बताएका छन् । पार्टीले रुपन्देहीको धकधईमा सोमबार आयोजना गरेको कार्यक्रममा बोल्दै उनले यस्तो बताएका हुन् । 

अहिलेको संविधान संघीयता विरोधीहरूले बनाएकाले यसमा संशोधन आवश्यक रहेको यादवको भनाइ छ । ‘संघीयताको मर्म नबुझेका कांग्रेस र कम्युनिष्ट मिलेर बनाएको अहिलेको संविधान त्रुटिपूर्ण छ,’ यादवले भने,  ‘यसलाई संशोधन गर्नुपर्छ अन्यथा जनताले अर्को संविधान बनाउने छन् ।’

---

सात वटा प्रदेशको नक्सांकन र नामाकरण अव्यवहारिक र अवैज्ञानिक रहेको जिकिर गर्दै यादवले उच्चस्तरीय राज्य पुनःसंरचना आयोगको प्रतिवेदनअनुसार १० वटा प्रदेश नै उचित भएको बताए। ‘पाँच, सात जना मन्त्री बनेर झण्डावाला गाडी चढेरमात्र हुँदैन’, उनले भने, ‘प्रदेशलाई स्वायत्त र अधिकारसम्पन्न बनाउनुपर्छ।’

राज्यका हरेक निकायमा जनसंख्याका आधारमा हरेक वर्ग र समुदायको समानुपातिक प्रतिनिधित्व हुनुपर्ने अध्यक्ष यादवले बताए । पूर्वउपप्रधानमन्त्रीसमेत रहेका उनले अहिलेको संसदीय व्यवस्था नेपालका लागि उचित राजनीतिक प्रणाली नभएको तर्क गरे । साथै उनले अहिलेको निर्वाचन प्रणाली अत्यन्तै महँगो र गलत भएकाले पूर्णसमानुपातिक प्रणाली हुनुपर्ने जोड गरे ।