राणाले तोकेका आठ इजलास न्यायाधीशहरूद्वारा बहिष्कार

काठमाडौँ – प्रधानन्यायाधीश चोलेन्द्रशमशेर राणाको विषयलाई लिएर सर्वाेच्च अदालतको वातावरण झनै द्वन्द्वउन्मुख छ । आज शुक्रबार नेपाल बार एसोसियसनले प्रधानन्यायाधीशलाई सर्वाेच्च अदालतभित्र प्रवेश गर्न नदिने रणनीतिका साथ प्रदर्शन गर्‍यो । 

उक्त अवरोध छिचोल्दै प्रवेश गरेका प्रधानन्यायाधीश राणाले आज शुक्रबाररको लागि आठ वटा इजलास तोकेका थिए ।  तर, तोकिएको कुनै पनि इजलास बस्न नसकेको विवरण सर्वाेच्च अदालतले आफ्नो वेभसाइटमा उल्लेख गरेको छ । 

---

आजको इजलास सबै न्यायाधीशहरुले बहिष्कार गरे । त्यस्तै वकिलहरुले पनि सबै इजलास बहिष्कार गरेर प्रधानन्यायाधीश राणाविरुद्धको आन्दोलनमा होमिए ।  आज शुक्रबार तोकिएको आठ वटा इजलासमा १३३ मुद्दा तोकिएको थियो । १५ दिनदेखि प्रधानन्यायाधीशहरुले बन्दी प्रत्यक्षीकरणको मुद्दा हेर्ने तर, अन्य मुद्दा तोकिएको इजलास बहिष्कार गर्ने गरेका थिए । बन्दी प्रत्यक्षीकरणको मुद्दा पनि न्यायाधीशहरुले नियमित रुपमा हेरेका छैनन् ।  
 
प्रधानन्यायाधीश राणाले आफूलाई भने आज कुनै पनि इजलास तोकेनन् । तर, न्यायाधीशहरु दीपककुमार कार्की, कुमार चुडाल, मीरा खड्का, प्रकाशमानसिंह राउत, हरिकृष्ण कार्की, विश्वम्भरप्रसाद श्रेष्ठ, हरिप्रसाद फुयाल, आनन्दमोहन भट्टराई, सुष्मालता माथेमाको इजलास तोकेका थिए । त्यस्तै बमकुमार श्रेष्ठ, मनोजकुमार शर्मा, प्रकाशकुमार ढुंगाना, नहकुल सुवेदी, कुमार रेग्मी र तेजबहादुर केसीलाई इजलास तोकेका थिए। यीमध्ये सात संयुक्त र एउटा एकल इजलास थिए।