न्यायाधीश, नेपाल बार र सर्वाेच्च बारको बैठक पाँच न्यायाधीशद्वारा बहिष्कार

काठमाडौँ – प्रधानन्यायाधीश चोलेन्द्र शमशेर राणाले आन्दोलनरत न्यायाधीशहरुलाई वार्तामा आउन आग्रह गरेपछि न्यायाधीशहरूले नेपाल बार र सर्वोच्च बारका पदाधिकारीसँग छलफल गरे । तर, उक्त छलफल सर्वोच्चका पाँच न्यायाधीशले नै बहिष्कार गरेका छन् । 

न्यायाधीशहरू तेजबहादुर केसी, बमकुमार श्रेष्ठ, कुमार चुडाल, कुमार रेग्मी, मनोज शर्माले न्यायाधीश, नेपाल बार र सर्वाेच्च बारबीचको बैठक बहिष्कार गरेका हुन् । योसँगै आन्दोलनरत न्यायाधीशहरूबीच पनि फुट देखिएको छ । न्यायाधीशहरूको बहिष्कारपछि आजको बैठक निष्कर्ष विहीन टुंगिएको छ । बैठक भोलि पनि बस्ने छ । प्रधानन्यायाधीशले संवादका लागि आफू तयार रहेको भन्दै विज्ञप्ति जारी गरेपछि नेपाल बारले भने भ्रष्ट प्रधानन्यायाधीशसँग वार्तामा नबस्ने बताएको छ ।  

---

प्रधानन्यायाधीश राणाको राजीनामा माग गर्दै सर्वोच्चका न्यायाधीशहरूले इजलास बहिष्कार गर्दै आएका छन् । बारले भने धर्ना र प्रदर्शन गर्दै आइरहेको छ ।