कांग्रेस महाधिवेशन : सर्लाहीमा निर्वाचन अधिकृतमाथि हातपात

जनकपुरधाम - नेपाली कांग्रेस सर्लाहीका निर्वाचन अधिकृतमाथि कार्यकताले हातपात गरेका छन् । वडा अधिवेशनका लागि मतदान अधिकृत खटाउने विषयमा पार्टी कार्यालयमा बसेको बैठकका क्रममा सांसद् अमरेश सिंह र पूर्वसभापति लक्ष्मण यादव पक्षधर कार्यकताले निर्वाचन अधिकृत दिवाकरराज पाण्डेमाथि हातपात गरेका हुन् । 

जिल्लाका २० स्थानीय तहका दुई सय वडामा मंसिर २ गते चुनाव गर्ने पूर्वसहमतिअनुसार निर्वाचन अधिकृत खटाउने विषयमा बैठक बसेको थियो । ‘निर्वाचन अधिकृत खटाउनेबारे पार्टी कार्यालय मलगंवामा बसेको बैठकका क्रममा सांसद् सिंह र पूर्वसभापति यादव समूहका कार्यकर्ता एक्कासी आएर तिम्रो यहाँ काम छैन, यहाँबाट जाउ भन्दै हातपात गरेका हुन्,’ जिल्ला सभापति नागेन्द्रकुमार रायले बताए ।

---

निर्वाचन अधिकृतको विवादका कारण मंसिर २८ गते नै हुनुपर्ने वडा अधिवेशन हालसम्म हुन सकेको छैन । पूर्वसभापति यादव र सांसद् सिंह पक्षधरले कब्जा जमाएका पार्टीका भातृ संगठन शिक्षक संघले आफू अनुकुल निर्वाचन अधिकृत तोकिनुपर्ने अडान राखेको कारण वडाहरुमा निर्वाचन हुन नसकेको सभापति रायले जानकारी दिएका छन् । यस्तै केन्द्रीय सदस्य शम्भुलाल श्रेष्ठले पनि निर्वाचन अधिकृत खटाउनेबारे दुई पक्षीय छलफल भइरहेका बेला पौडेल पक्षले जिल्ला पार्टी कार्यालय घेरा हालेर निर्वाचन अधिकृत पाण्डेलाई हातपात गरेका जानकारी दिए ।