संविधान कार्यान्वयनका लागि कांग्रेस बलियो बन्नुपर्छ : वालकृष्ण खाण

रुपन्देही - नेपाली कांग्रेस केन्द्रीय सदस्य बालकृष्ण खाणले संविधान कार्यान्वयनका लागि आफ्नाे पार्टी बलियो बन्नुपर्ने स्पष्ट पारेका छन् । पार्टी रुपन्देही जिल्ला सभापतिमा रामकृष्ण खाण सर्वसम्मत भएपछि शनिबार आयोजित घोषणा सभामा बोल्दै गृहमन्त्रीसमेत रहेका खाणले यस्तो बताएका हुन् ।

‘नेपाली कांग्रेस बलियो भयो भने मात्र संविधान कार्यान्वयन हुन सक्छ । विधिको शासन अवलम्बन हुन्छ,’ उनले भने, ‘कांग्रेस कमजोर भए जनता कमजोर हुन्छन्, जनताका मौलिक अधिकार कमजोर हुन्छन् । लोकतान्त्रिक मूल्य र पद्धति कमजोर हुन्छ । संविधान कमजोर हुन्छ ।’

---

पार्टीभित्र सहमति र सहकार्य भएमात्र कांग्रेस बलियो हुने भन्दै उनले कांग्रेस बलियो बनाउने अभियान रुपन्देहीबाट सुरु भएको उल्लेख गरे । निर्वाचनबाट चुनिएको भन्दा सर्वसम्मतिबाट चुनिएको सभापतिको कार्यभार र जिम्मेवारी बढी हुने खाणको भनाइ छ ।

‘रामकृष्णजी कुनै गुटको होइन, साझा सभापति हो । साझा रूपमै तपाईंलगाययत जिल्ला कार्यसमिति पदाधिकारी र सदस्यहरूले आफ्नो उत्तरदायित्त्व पूरा गर्न सफल हुनुहुनेछ भन्ने मलाई विश्वास छ,’ उनले भने । यस्तै उपसभापतिमा थानेश्वर घिमिरे र अनिता शाह सर्वसम्मत भएका छन् । 

सभापतिमा निर्वाचित खाण गृहमन्त्री खाणका सहोदर भाइ हुन भने, शाह संघीय सांसद भरत शाहकी श्रीमति हुन् । गृहमन्त्री खाणको पहलमा रामकृष्ण जिल्ला सभापतिमा सर्वसम्मत चुनिएका हुन् ।