माओवादी केन्द्र त्रियुगा नगर अध्यक्षमा गीता खड्का निर्वाचित

उदयपुर - नेकपा माओवादी केन्द्र त्रियुगा नगर कमिटीको अधिवेशनबाट गीता खड्का कार्की अध्यक्षमा निर्वाचित भएकी छन् । माओवादी त्रियुगा नगरपालिकाको अध्यक्षमा खड्काले ४३ मत प्राप्त गर्दै विजयी भएकी हुन् । अध्यक्षका उम्मेदवार नरबहादुर कार्कीले १८ मत पाएका छन् । यस्तै उपाध्यक्षत्रयमा मानबहादुर राई, प्रह्लाद विश्वकर्मा र महिला उपाध्यक्षमा सावित्रा थापा विजयी भएका छन् । उपाध्यक्षमा विजयी राईले ५१ मत, विश्वकर्माले ४७ मत र थापाले ४४ मत पाएका छन् । 

उपाध्यक्षका उम्मेदवारद्वय कमलादेवी राईले २० मत र रामप्रसाद बरालले १८ मत पाएका छन् । यस्तै सहसचिवमा कुलबहादुर कटुवाल ४४ मत प्राप्त गरी विजयी भएका छन् भने उनका निकटतम प्रतिद्वन्द्वी गोपाल कट्टेलले १८ मत पाएका छन् ।  

---

कोषाध्यक्षमा मनोजकुमार पौडेल ४८ मत प्राप्त गरी विजयी भएका छन् भने उनका निकटतम प्रतिद्वन्द्वी काशीकुमार कार्कीले १८ मत पाएका छन् । नगर कमिटीको सचिवमा कुरुङ राई सर्वसहमति चयन भएका छन् । निर्वाचनमा वडाबाट चुनिएर आएका ६५ जना प्रतिनिधिले मतदान गरेका छन् । पार्टीको तर्फबाट सर्वसहमतीको वातावरणको प्रयास गरिए पनि असफल भएपछि निर्वाचन गरिएको जनाएका छन् । ६५ सदस्यीय नगर कमिटीका लागि चार पदमा चुनाव भएको हो भने अन्यमा सर्वसहमति भएको छ । 

यस्तै माओवादी केन्द्र त्रियुगा नगरपालिकाबाट प्रदेश प्रतिनिधि सर्वसहमतिमा चयन भएका छन् । पार्टीले १० जना प्रदेश प्रतिनिधि सर्वसहमति चयन भएका हुन् । प्रमुख निर्वाचन आयुक्त रमेशचन्द्र रोकाका अनुसार प्रतिनिधि चयनमा मानबहादुर राई, विमल किराँती, सम्झना तामाङ, रुद्र अधिकारी, किरण राई, दुर्गा कार्की, सावित्रा थापा, राजकुमार थापा, केदार दनुवार र प्रल्हाद विश्वकर्मा चयन भएका छन् ।