कांग्रेस महाधिवेशन : उपसभापतिको मत गणना सुरु

काठमाडौँ – नेपाली कांग्रेसको १४औँ महाधिवेशनअन्तरर्गत उपसभापतिका उम्मेदवारहरुको मत गणना सुरु भएको छ । केन्द्रीय निर्वाचन समितिका संयोजक गोपालकृष्ण घिमिरेकाअनुसार आज उपसभापतिका उम्मेदवारको मात्रै मत गणना हुनेछ । 

‘भर्खरै गणनाको लागि मत पत्र खन्याउने काम भयो,’ इकागजसँग कुरा गर्दै उनले भने । उपसभापतिका लागि सभापति निर्वाचित भएका शेरबहादुर देउवाको प्यानलबाट पूर्णबहादुर खड्का र विजय गच्छदार उम्मेदवार छन् भने सभापतिमा पराजित शेखर कोइरालाको प्यानलबाट चन्द्र भण्डारी र धनराज गुरुङ छन् । त्यस्तै महेश आचार्य र दिव्यश्वरी शाह पनि उपभापतिका उम्मेदवार हुन् ।  निर्वाचन समितिकाअनुसार तीन ठाउँमा मत गणना हुनेछ । आजै राति मत परिणाम आउने बताइएको छ ।

---