कर्णालीका सात जिल्लामा एमाले अधिवेशन सुरु

सुर्खेत - नेकपा एमालेको आठौं अधिवेशन अन्तर्गत कर्णालीका विभिन्न जिल्लाहरुमा अधिवेशन सुरु भएको छ । प्रदेशका १० जिल्लामध्ये सातवटामा आजदेखि अधिवेशन सुरु भएको छ । सुर्खेत, दैलेख, जुम्ला, डोल्पा, जाजरकोट, रुकुमपश्चिम र सल्यान जिल्लाको अधिवेशन सुरु गरिएको छ । मुगु, हुम्ला र कालिकोटमा भने अधिवेशन स्थगित भएको छ ।

एमाले  प्रदेश कमिटीका अध्यक्ष विनोद कुमार शाहले प्रदेशका सबै जिल्लामा नयाँ नेतृत्व सर्वसम्मतिबाट छनौट गर्ने बताए । ‘सकभर नयाँ नेतृत्व सर्वसम्मत रुपमा छनौट गरौ भन्ने हो’ शाहले भने, ‘सर्वसम्मत नभए प्रजातान्त्रिक प्रक्रियामा अनुसार चुनावमा जानुपर्ने हुन्छ ।’ त्यसका लागि जिल्लातहका नेताहरु छलफलमा जुटेका छन् । साथै, हुम्लाको अधिवेशन एक महिनाको लागि स्थगित भएको छ ।

---

उक्त जिल्लामा आउँदो माघको २३ गते अधिवेशन हुनेछ । यस्तै, मुगु जिल्लामा यहीँ पुस २७ गते सम्मको लागि स्थगित भएको छ भने कालिकोटमा पुस २४ गते शनिबार अधिवेशन हुने एमालेले कर्णाली प्रदेशले जनाएको छ । बिहीबारबाट भएको मौसम बदलीको कारणले चिसो बढेको हुँदा तीन जिल्लामा अधिवेशन स्थगित गरिएको बताइएको छ । एमाले नेता एंव प्रदेशसभा सांसद सुशिल थापाले सकेसम्म सर्वसम्मतिअनुसार अधिवेशनमा जाने बताए । ‘धेरैजसो ठाउँमा सर्वसम्मत हुन गाह्रो छ’ उनले भने, ‘त्यहाँ चुनावको विकल्प छैन ।’